Umkhokheli webandla le CCC, uMnu. Nelson Chamisa useze watshayela ihlombe uMnu. William Ruto ngokukhethwa ukuba nguMongameli wele Kenya yena wayeke wakhanya esekela uMnu. Raila Odinga owanqotshwayo kulolukhetho.
UMnu. Odinga wayengumngane kamuyi, uMnu. Morgan Tsvangirai.
UChamisa uthe kuyajabulisa ukuthi eleKenya laqhuba ukhetho olulokuthula.
Umabhalane kahulumende weMelika uMnu. Antony Blinken usetshayele ihlombe uMnu. William Ruto owe Kenya, ngemva kwesinqumo esethulwe ngumthethwandaba we Supreme Court yalelolizwe, esokuthi ngempela nguye owanqoba kukhetho olwaqhutshwa ngenyanga edluleyo elokudinga umongameli impumela yalo eyayiphikiswa nguMnu. Raila Odinga owayencintisana laye.
UMnu. Blinken uthi ilizwe leMelika likhangelele ukusebenza kuhle loMnu. Ruto, kunhlelo ezizaphathisa ilizwe lakhe leleKenya.
Abakhokheli bamanye amazwe labo batshayele uMnu. Ruto ihlombe.
UMnu. Odinga uthi uyasamukela isinqumo somthethwandaba lanxa engavumelani laso ngoba uyahlonipha ezomthetho.
Uthi ubelobufakazi obunengi obukhomba ukuthi impumela yokhetho ayiqondanga.
mKodwa umthethwandaba we supreme court uthi ukhetho lolu lwaqhutshwa ngemfanelo njalo kwakungelakuqilibezela.
Ukuhlaziya loludaba, uSithandekile Mhlanga weStudio 7 uxoxe loMnu. Walter Nsununguli Mbongolwane, ingcwethi ecubungula ezombusazwe oqala ngokuchasisa umbono wakhe ngesinqumo somthethwandaba.
