amalinks wokungena

Breaking News

I-ZIMSTAT Ithi Kulabantu Abaphose Befike Isigidi Abaphuma eZimbabwe Kusukela Ngo2012


Zimstats

Lokhu kuza ngesikhathi isimo somnotho weleZimbabwe siwonakala ngamandla, inengi labaphumileyo, abangaba ngamatshumi ayitshiyagalombili lane ekhulwini (84%) bephume besiyadinga imsebenzi. Abanye ngabalandela izihlobo zabo kukanti abanye baphuma besiyathuthukisa izifundo.

Gaborone..........

Uhlangothi lukahulumende olubona ngezenombolo, olwe Zimbabwe National Statistics Agency iZIMSTAT luthi kulenani labantu elingaphansi kwesigidi esisodwa elaphuma elizweni kusukela ngomnyaka ka 2012 kusiyafika lonyaka. Inengi laphuma lisiya emazweni angomakhelwane afana leSouth Africa, Botswana kanye lphetsheya kolwandle. Ugwalo olusanda kukhitshwa yiZIMSTAT luthi abantu abangaphansi kwesigidi (908,914) baphuma elizweni, inengi lisiya dinga imsebenzi.

Lokhu kuza ngesikhathi isimo somnotho weleZimbabwe siwonakala ngamandla, inengi labaphumileyo, abangaba ngamatshumi ayitshiyagalombili lane ekhulwini (84%) bephume besiyadinga imsebenzi. Abanye ngabalandela izihlobo zabo kukanti abanye baphuma besiyathuthukisa izifundo.

Isabelo seMatebeleland South yiso esihamba phambili ngenani labantu abaphezulu abaphuma elizweni, bekusilinganiso sokungaphezu kwamatshumi amathathu ekhulwini (33%).

IZIMSTAT ithi kungaba kulabanye abangabalwanga ngoba bengabe baphuma imuli yonke, okutsho ukuba abafakwanga kunani leli.

Umnunzana Ngqabutho Mabhena owenhlanganiso yeZimbabwe Community kweleSouth Africa uthi akula ndlela ecacileyo yokuphikisan loba ukusekela okukhitshwe yiZIMSTAT.

“Kunzima ukuphikisana lazo inombolo lezi ngoba akukaze kube lophenyo lokutshengisa ukuthi abantu abaphandle kwelizwe bangaki. Okunye okumele sikunanzelele yikuthi abanye baphuma bengalancwadi zokuhambisa Asikwazi ukuthi lokhu bakufakele ilihlo bakukhangela.”
Inhlanganiso yeZIMSTAT yona ithi ikhulumisane lemuli ezitsheyeneyo ngesikhathi lohlelo lokubala uzulu lwalonyaka, olwe National Housing and Population Census. Njalo bekubuzwa ngabantu abaphuma phandle kwelizwe phakathi komnyaka ka2012 lo 2022.

Umnunzana Mabhena uthi ukuqala ukukhulumisana ngodaba lokuthi kulabantu abangaki phandle kwelizwe kuzaphathisa, ikakhulu bekulokuphikisana phezu kwenani labantu emhlubulweni weMatebeleland.

“Uhlelo lweCensus lwathi kulabantu abalutshwana ikakhulu koBulawayo. Kodwa lubadaba oluqakathekileyo okumele sikhulumisane ngalo, ikakhulu lapha eSouth Africa okuthiwa izizalwane zeZimbabwe sezinengi kakhulu.”
Inengi labaphuma elizweni lalubhekisa eSouth Africa, befika phose amatshumi ayitshiyagalombili (85%), kukanti abahlanu ekhulwini (5%) bayakweleBotswana, abathathu ekhulwini (3%) baya phetsheya kodlwandle kuboBhilithani. Abanye njalo baya kwamanye amazwe afana labo Australia, New Zealand, Canada lamanye.

Ohlala kweleSouth Africa, umnunzana Mthabisi Dube uthi inombolo zeZIMSTAT azivezi iqiniso elipheleleyo.

“Inombolo lezi ziphansi ngoba abantu abaseSouth Africa kuphela bayafika leyo nombolo. Inani elingaphandle kwelizwe elabantu abaphuma phandle kwelizwe eminyakeni elitshumi kumele iyadlula leyi ekhitshwe yiZIMSTAT.”

Kucatshangelwa ukuthi kulabantu abadlula izigidi ezinhlanu (5million) abangaphandle kwelizwe, inengi laxotshwa yibunzima bomnotho. IZIMSTAT ithi inengi elaphuma eminyakeni elitshumi edluleyo, ngamadoda, njalo ontanga, abaphakathi kweminyaka engamatshumi amabili lamatshumi amabili lane, yibo abaphuma kakhulu elizweni.

Facebook Forum

XS
SM
MD
LG