WASHINGTON DC - Ukwethekelela kukaMongameli Emmerson Mnangagwa endaweni yesikhumbuzo sabantu ababulawa ngumbuqazwe kweleRwanda, sokuphehle imbono etshiyeneyo.
Abanye bathi kumele uMnangagwa azinuke amakhwapha ngombhuqazwe weGukurahundi owabulalisa abantu abedlula inkulungwane ezingamatshumi amabili, 20,000, eMidlands laseMatabeleland.
Kumbiko awulobe wawutshiya eKigali Genocide Memorial uMnangagwa uthe uyadana kakhulu ngokubulawa kwabantu bohlobo lwesiTutsi abafika phose isigidi.
Uthe lokho akumelanga kuvunyelwe futhi loba sokutheni.
Kodwa abalwela amalungelo oluntu bathi uMnangagwa kumele alungisise udaba lweGukurahundi elandele umzekeliso weRwanda, yona eyalungisa umbhuqazwe wayo.
Lanxa yena uMnangagwa esithi uphakathi kokululungisisa loludaba esebenza lenkokheli yosiko, umanyano weUnited Nations uthi awusuthiseki ngendlela aphatha ngayo loludaba.
UMnangagwa ngomunye wabantu abetheswa icala lokuphatheka kumbhuqazwe weGukurahundi.
Ukuhlaziya loludaba sixoxe lelunga leZanu PF Central Committee uMnu Joseph Tshuma endawonye lokhansila webandla leCCC uMnu Edwin Ndlovu onguye osungula lingxoxo.