Sekulungiselelwa ukufihlwa kwendlovukazi uQueen Elizabeth, okhotheme ngoLwesine eScotland, njalo lokugcotshwa kwenkosi uCharles III, okuqale izolo okuzathatha phose umnyaka wonke.
Indlovukazi yakwele Bhilithane itshiye indodana yakhe oseyinkosi uCharles III, ephethe intambo zobukhosi bamangisi. Idale lephalamende eleHouse of Lords lamalunga ePrivy Council, akhokhela isililo sendlovukazi njalo lokubusa kweNkosi uCharles III, osecele ukuba kubelamalanga ayisikhombisa okukhalela unina.
INkosi uCharles III ukhulume okwakuqala namuhla edale lephalamende selokhu ethethe ubukhosi kulandela ukutshona kwendlovukazi.
UNkosikazi Liz Truss, umkhokheli wakwele Bhilithane, uthi uQueen Elizabeth wayengumuntu kazulu.
Bayakhala lakwamanye amazwe ngokutshona kwendlovukazi. UMongameli Joseph Biden wakwele Melika uthi uQueen Elizabeth wayethandwa ngabantu emhlabeni wonke jikelele.
Banengi abakhalela umdeni wendlovukazi. UMnu. Mbuso Ngwenya, ingcwethi kwezamasiko, uthi …
Kulabantu abathi indlovukazi kayenzelanga lutho uzulu eZimbabwe. Omunye wabo nguMnu. Dalubuhle Jamela.
Lokhu kusekelwa nguMnu. Mbuso Mhlanga, olandela ezombusazwe.
Kodwa uNkosazana Lubelihle Khabo uthi abazi abakukhulumayo abachothoza indlovukazi esikhotheme.
UMnu. Mgqondobazi Magonya, ingcwethi kwezamasiyo uvumelana laye.
UMagonya uthi indlovukazi ayilamandla yokwenza okucatshangwa nguzulu.
UQueen Elizabeth ubhubhe eseleminyaka yokuzalwa engamatshumi ayisificamunwemunye lasithupha – 96. Akwaziwa ukuba uzafihlwa nini.
Kusenjalo, bayakhala abanye abantu kwele Zimbabwe kulandela ukutshona kwendlovukazi.