amalinks wokungena

Breaking News

Umahluli Wedale leHigh Court Uxotshwa Umsebenzi


High Court Zimbabwe

Umahluli wedale laphezulu eleHigh Court, uJustice Edith Mushore, usexotshwe umsebenzi esetheswa icala lokungaqhubi kuhle umsebenzi.

UMushore ubeselenyanga engayi emsebenzini ngemva kokwetheswa amacala okungenelisi ukuqhuba kuhle umsebenzi wakhe.

Kusenjalo, umantshi uFaith Mushure, owahlulela udaba lwabesifazana abathathu abebandla leCitizens Coalition for Change (CCC), ngoLwesihlanu wehlulekile ukuza edale likamantshi eHarare, okwenze ukwethulwa kwesigwebo obekumele kwenziwe kudluliselwe phambili kuMvulo weviki ezayo.

Abathathu laba bebekhangelelwe ukugwetshwa kucala abeletheswayo lokuqamba amanga ngomnyaka ka2020 okuthi babethunjiwe zinsoli zika hulumende ngemva kokunyamalala okwensuku ezintathu.

Abathathu laba ababalisa ummeli we Harare West edale lephalamende, uNkosazana Joanna Mamombe, uNkosazana Cecelia Chimbiri loNkosazana Netsai Marova bathunjwa okwamalanga ambalwa ngemva kokutshengisela elokitshini le Warren Park kodwa uhulumende wabahlamukela esithi baqamba amanga.

Udaba lwabo soluleminyaka emibili luthonisiswa, namhlanje bekumele bagwetshwe emthethwandaba we Rotten Row eHarare kodwa kakusabanga njalo.

Iqgwetha labathathu laba uMnu Alec Muchadehama uchasise ngokwenzakeleyo namhlanje.

“Bekungasi mapholisa enyakazela phandle komthethwandaba bevimba uzulu obe eze ukuzokuzwa labathathu laba begwetshwa.”

Kolunye udaba uMantshi uTaurai Manwere wale isicelo sama gqwetha amela omnumzana Job Sikhala lo Godfrey Sithole esikuba kubotshwe abatshutshisi uLancelot Mutsokoti lo Michael Reza ngoba bengalandelanga isinqumo sedale likaMantshi.

Abatshutshisi laba babikwa bengazange balandele isinqumo sedale esokuba banikeze amaqgwetha ka Sikhala lo Sithole incwadi eziveza ukuba amacala abo ngawani.

UManwere uveze ukuba akula cala elenziwa ngabatshutshisi laba esithi idale kalizange liphe ilanga lesikhathi incwadi lezokumele ziphiwe amagqwetha lawa.

Iggwetha lika Sikhala, uMnu. Fred Masarirebvu, uveze ukuba bamangele ngesinqumo sedale lesi.

Udaba lolu luzaqhubeka ngo Lwesibili ngeviko ezayo. Ilunga le CCC, uNkosikazi Elen Shiriyedenga, uthi amalunga ebandla lakhe ayaqhubeka ehlukumezwa emithethwandaba.

Abebandla leZANU PF bathi kabasoze bakhulume ngendaba lezi besithi sizemadale omthethwandaba.

Facebook Forum

XS
SM
MD
LG