amalinks wokungena

Breaking News

Izisebenzi Zikahulumende Zikhala Ngeholo Eliphansi


FILE - Izisebenzi zikahulumende sikhonona ngeholo eliphansi.

lzisebenzi zikahulumende eziqale ukwamukela iholo izolo ziveza ukudana okukhulu ngokuthi umqatshi akagcwalisanga isithembiso sakhe sokwengezelela iholo.

Lokhu kwenzakala ngemva kokuba umphathintambo wezemali, uMnu. Mthuli Ncube, ethembise ukwengeza iholo ngoMpandula.

Izisebenzi zikahulumende ziveze imizwa ehlukeneyo ngokungagcwalisi isithembiso okwenziwe nguhulumende bethi kumele ananzelele ukuthi intengo yempahla ayimanga ukukhuphuka ezitolo kanye lendleko zezikolo.

UMnu. Anthony Majongosi, umngcinisihlalo weZimbabwe Nurses Association koBulawayo, uthi umsebenzi wabo bayawuthanda bezama lokusindisa abagulayo kodwa bona abatholi iholo elenelayo.

"Siqhubekela phambili sisithi sifuna basibhadale ngama US dollar,simelele ukuthi sibone ukuthi bazasibhadala yini Umsebenzi wethu siyawufuna siyahamba ngendaba yokuthi abagulayo siyathanda ukuthi sibakhangele sibone ukuthi bayaphila kuhle. Sithi igovernment isenzele imali ekwanayo sifuna iUS."

UMnu. Thembekile Ncube, umgcinisihlalo weAmalgamated Teachers Union of Zimbabwe, uthi umqhatshi ubadanisile okwamagama.

"Uhulumende kagcwalisanga isithembiso sakhe sokukhweza iholo kuyonale inyanga lokhu kutshengisa ukuthi uhulumende uyisiqholo kafuni kulalela izikhalazo zezisebenzi zakhe, sesiside isikhathi uhulumende esenza izithembiso kodwa engazigcwalisi. Njengababalisi izingatsha ezisimelayo zizahlangana zicubungula indlela ezizakwenza uhulumende athathe inyathelo lokukhweza iholo."

UNkosikazi Sazini Ndebele omunye wezisebenzi zikahulumende uthi iholo labo aleneli ngitsho lakancane uma ukhangela indleko ababhekane lazo.

“Kuyasidanisa ukuthi uhulumende kagcini izithembiso zakhe. Besikhangelele ukuthi imali izabuya ithe xaxa, kodwa akuzange kube lomahluko. Thina lokuthi singene ku strike asivunyelwa, yikuthemba amanye ama civil servants ukuthi akhonone ngeholo. Ungakhangela ukuthi ama fees akhwele njani, ngeke ufundise abantwana.

UMnu. Pride Ncube, omunye wezisebenzi zikahulumende, uthi uhulumende akalandaba lezisebenzi zakhe njengoba intengo yempahla ezimqoka ikhuphuka nsukuzonke.

“Imali siyayibona ingena kuma account kodwa ngibona angathi uhulumende usithembise imbuzi esesakeni.Lakhathesi lokhe engazange engezelele njengokuthembisa kwakhe ukuthi mhlaka 1 September uzangezelela imali lokhe ifanana laleyi ade ikhona emuva okungangokuthi izithembiso zakhe azithembekanga njengoba intengo yempahla ikhuphuka yena kakunanzeleli ukuthi lomholo kumele ukhuphuke."

Umphathintambo wogatsha olukhangele izisebenzi zikahulumende kanye lenhlalakahle kazulu umnumzana Paul Mavima wenqabe ukuthatshwa ilizwi kodwa uchaze ukuba kufanele kube lengxoxo phakathi kukahulumende lenhlanganiso ezimele izisebenzi ukuze kube lesivumelwano esifakwayo.

Uchaze ukuba umphathintambo okhangele ngezemali umnumzana Mthuli Ncube wathembisa ukukhuphula iholo ngenyanga kaMpandula nxa umnotho welizwe wenze kuhle. Wengeze ethi uhulumende uzimisele ukuthuthukisa iholo lezisebenzi zakhe.

Facebook Forum

XS
SM
MD
LG