Kulezizalwane zeZimbabwe esezihlala eMelika ezingamalunga amabandla awezombusazwe aphikisayo ezihambe zayatshengisela esilindweni sendizamtshina ngesikhathi uMongameli Emmerson Mnangagwa efika eNew York kwele Melika lapho azangena umhlangano omkhulu wenkokheli yamazwe womhlaba owe 77th session of United Nations General Assembly (UNGA).
Abantu laba batshengisela bekhonoa ngendlela abathi uhulumende kaMnangagwa uhlukumeza abakumabandla aphikisayo.
UMnangagwa ubikwa ebuye lequla labantu abafika phose ikhulu - 98, abagoqela abantwabakhe ababili.
Abatshengisela emigwaqweni bathi uMongameli Hakainda Hichilema wakwele Zambia, leyinye inkokheli yamanye amazwe ihamba lequla labantu abangamatshumi amabili kuphela.
UMnu. Joseph Tshuma, isiphathamandla sebandla leZANU-PF, uthi abatshengisela eNew York ngabantu abathengwe ngamazwe entshonalanga ukwenzela ukuyangisa uMnangagwa.
“... Abantu baduba ngokuba lenzondo becina sebengasakwazi lento abayikhulumaya. Lokho okokuthi usuke labantu abalikhulu ngamanga aluhlaza tshoko. Umongameli wethu siyamazi engumongameli ovele efuna ukuba into zonke zibe yizinto ezisetshenzwayo, hatshi ukuphonguthatha.
“Siyambona uyehla engena ku-ground esenza izinto. Uyambona lapho okulungiswa khona umgwaqo ukhona, okulungiswa khona amadamu ukhona, okulungiswa khona izibhedlela lamaklinika ukhona, ngenxa yokuthi ufuna ukuthi ilizwe lethu livuke. Kodwa silabantu abayizitha abasetshenziswayo abasekelwa ngamazwe angenge leMelika kanye lezwekazi leEurope abafuna ukuthi into zethu zingahambi kuhle ngapha eZimbabwe. Ngakho ke baba lomona nxa bebona umongameli esenza into eqondileyo.”
UTshuma uphinde wathi, “Kuyamangalisa ukubona izizalwane zalapha kwele Zimbabwe zibuya khonangale eNew York zithi zifuna ukuzo-demonstrator kodwa ngapha umongameli evulile wathi ‘i-Zimbabwe ivulekile, i-open for business’, njalo wathi yena ‘ngifuna uku-engager and to re-engage’. Okutsho ukuthi khona ngumuntu okhululekileyo, ovulileyo wathi ‘buyani sibonisane’, waze watsho futhi ukuthi khona, ‘sifuna izandla zonke, sifuna ingqondo zonke’, as long as ungumntwana weZimbabwe, ulokokwenza ekuvuseni lokuthuthukisa iZimbabwe.”