amalinks wokungena

Breaking News

Abantu Abanengi Bathi Akulanto Ekhanyayo Eyenziwa NguMnangagwa Emhlanganweni weUnited Nations General Assembly


FILE: UMongameli Emmerson Mnangagwa emhlanganweni oweUnited Nations General Assembly

Ababona okwenzakalayo emhlanganweni weUnited Nations General Assembly bathi akulalutho olubambekayo olwenziwa nguMongameli Emmerson Mnangagwa selokhu waqala ukuya emhlanganweni lo eNew York kwele Melika.

Kodwa abakubandla leZanu PF bathi kunengi asekwenzile uMnangagwa okuveza ukuba akwethula emihlanganweni yeUNGA kuyathophela.

Emihlanganweni yeUnited Nations General Assembly, uMnangagwa uvame ukukhuluma ngezijeziso zenotho ezafakelwa inkokheli yebandla leZanu PF kanye lokuthi eleZimbabwe selivulele amathuba osomabhizimusi bakwamanye amazwe ukuba betshale imali yabo eZimbabwe.

Ingcwethi kwezombusazwe labalwela ilungelo loluntu bathi uMnangagwa usechithe isikhathi eside ekhuluma ngakho konke lokhu okungasoze kuguqulwe ngamazwe entshonalanga athi lokhu ekhahlameza uzulu.

UMnu. Nhlanhla Ncube, eyinye yengcwethi lezi, uthi uMnangagwa kaqale ngokulungisa okuhlupha abantu eZimbabwe engakethuleli umhlaba wonke ngezijeziso zenotho lokunye.

UNcube uthi akuyindawo lokhu akukhuluma emihlanganweni yenkokheli yamazwe omhlaba wonke jikelele.

Lokhu kusekelwa nguMnu. Effie Dlela Ncube, olwela ilungelo likazulu, othi uMnangagwa ubamba inhlwa ngekhanda.

UMnu. Malaki Nkomo, okubandla leZanu PF, uthi kunengi okwenziwa nguMnangagwa eZimbabwe.

UMnangagwa labanye bakhe bafakelwa izijeziso zenotho ngamazwe entshonalanga abethesa umlandu wokuqhuba ukhetho olungakhululekanga njalo lokwephula ilungelo likazulu.

Facebook Forum

XS
SM
MD
LG