amalinks wokungena

Breaking News

UMnangagwa Uthi Izijeziso Zenotho Ezafakelwa Inkokheli Yebandla leZanu PF Zibhidliza Inhlelo Ezitshiyeneyo


FILE - UMongameli Emmerson Dambudzo Mnangagwa
FILE - UMongameli Emmerson Dambudzo Mnangagwa

UMongameli Emmerson Mnangagwa uthi kumele zesulwe izijeziso zenotho ezafakelwa inkokheli yebandla leZanu PF ngoba zibisela emuva ingqubekela phambili eZimbabwe. UMnangagwa wethule amazwi la namuhla emhlanganweni omkhulu oweUnited Nations General Assembly eNew York kwele Melika.

Uthe ilizwe lakhe lizama ngamandla wonke ekuthuthukiseni uzulu ngokuqhuba inhlelo ezinjengokulungisa imigwaqo, ukulinganisa amathuba abesilisa labesifazana, ukwemba okutshiyeneyo, ukulima lokunye kodwa konke lokhu kubiselwa muva yizijeziso zenotho.

Ubonge kakhulu amazwe akuzwekazi leAfrica akhankasela ukuba zesulwe izijeziso lezi.

Uphinde wathi izijeziso lezi zibisela muva inhlelo ezokwenqabela ukuvimba ukumemetheka kwegciwane leCOVID-19, ukuboleka imali emabhanga omhlaba wonke jikelele, ukwakha lokwethula imfundo olohlonzi, ukulungisela abantu indawo ezilamanzi ahlanzekileyo lokunye.

UMnu. Den Moyo, olandela ezombusazwe ekwele Melika, uthi akumangalisi okukhulunywa nguMnangagwa.

Uqhubekela phambili umhlangano oweUnited Nations General Assembly lapho uMnangagwa abuye khona lequla labantu elicatshangelwa ukuba lifika phose amatshumi ayisitshiyagalolunye – 89.

Abanye abantu bathi akulanto ebambekayo etholwa ngele Zimbabwe emihlanganweni le. Kodwa bakhona njalo abathi kuqakatheke kakhulu ukuthi uMnangagwa abelabanye bakhe ukuze abekwazi okwenzakala kwamanye amazwe njalo ethulele umhlaba wonke jikelele okwenzakala elizweni lakhe.

Umhlangano lo wenzakala ngesikhathi inhlanganiso ezimeleyo eyeCIVICUS Monitor isithi uhulumende kaMnangagwa uncindezela ngamandla uzulu.

UMnu. Sikhumbuzo Mlalazi, igcwethi kwezombusazwe ezimeleyo, uthi kumele uMnangagwa angene imihlangano enje ngoba eleZimbabwe alehlukananga lamanye amazwe.

Kodwa uMnu. Nhlanhla Moses Ncube, okunhlanganiso yeFreedom Alliance, uthi uMngangagwa uzabuyela ekhaya ephethe izandla.

XS
SM
MD
LG