Ukuhamba kwamandla kagetsi eGwanda sekutshiye izakhamizi zaleli dolobho zibhekane lodubo olukhulu lokuswelakala kwamanzi okwesatshelwa ukuthi kungadala ukuqhamuka kwemikhuhlane yesihudo.
Izakhamizi zithi umanisipala sekumele aphume lamanye amaqhinga okupompa amanzi.
Umbiko okhitshwe ngumanisipala weGwanda uveza ukuthi ukuhamba kwamandla kagetsi okwamahola amanengi kunsuku ezisanda kudlula sekuphazamise umsebenzi wakhe wokumpompa amanzi esuka edamu esiya ematankeni.
UNkosikazi Lungile Masuku, oyisakhamuzi seGwanda, uthi njengabomama bathwele amagabha avuzayo.
“Ukuswelakala kwamanzi lapha eGwanda sekuyichallenge especially ebantwini abesifazane,indingeko zokusebenzisa amanzi ziba zinengi kwabesifazane kulebantwini besilisa, for the past two days bekungela manzi kungela amagesti so kuba luhlupho kakhulu abantu bayabe sebebhoda bedinga amanzi.”
UMnu. Edgar Ncube, omunye umhlali weGwanda, uthi umanisipala weGwanda sekumele aphume lamanye amaqhinga okupompa amanzi atshiyane lokusebenzisa ugetsi ohlala engekho.
“Aluba umanisipala uyadinga isupplement yeZESA kube lestandby yokuthi nxa kungela magetsi kubekhona indlela yokumpompa amanzi kungaba yigenerator kumbe iSolar kungasenzela ukuthi impilo ibelula ngoba kunje ziyaphela izinsuku kungela manzi amagetsi layo ehambile.”
Lamazwi agcizelelwe ngesinye njalo isakhamuzi saseGwanda uMnu Allan James Dube othi umanisipala kumele ahlale phansi lezakhamizi baxoxisane ngokumele kwenziwe.
“Ikhansili kumele ibeleConsultative meeting ibize izakhamizi kuhlalwe phansi sikhulume ngendaba yeSolar sikhulume ngendaba yegenerator, kokubili kungasisebenzela ikakhulu kathesi sihlangana lodubo lwamagetsi.”
UMeya weGwanda, uMnu Njabulo Siziba, uthi bacine bekhulumisana lenkampani yeZETDC izolo yabavulela amagetsi ngoba isimo sesisibi.
“Abantu balimele siphose savala izikolo kodwa uNkulunkulu ungenele abuyile izolo ebusuku lamuhla alokuphuma thize, sizakhangela ezinye indlela zikagetsi kodwa asiyonto esingathi sizavuka siyenze kusasa.”
Kusukela NgoMgqibelo owedluleyo eGwanda amagetsi abe hamba kusukela ngehola lesithupha ekuseni aphenduke phose ngehola lesitshiyangalolunye ebusuku.
Inkampani kagetsi eyeZETDC ibivele ibike ukuthi kusukela ngoMgqibelo odlulileyo izaquma amandla kagetsi okwamahola amanengi ngoba imitshina yayo esigugile ezithitshini lapho okuphehlwa ugetsi ezeKariba leHwange ingasebenzi kuhle njalo iyehluleka ukuthenga insimbi ezidingakalayo phetsheya.