Sokubhonjwe indlu kaMnu. Sybethi Musengezi, owaphanyeka udaba emthethwandaba esithi uMongameli Emmeerson Mnangagwa kangenanga ngemfanelo esikhundleni sikanobhela jikelele webandla leZanu PF.
UMusengezi utshele umsakazo weStudio 7 ukuthi ucabangela ukuba kujikelwe ibhomba lepethulo endleni yakhe eHarare lapho okutshe khona impahla enengi, egoqela imota izitulo lokunye.
UMusengezi uthe, “Ngikhuluma khonamanje amapholisa asendlini lapha bahlolisisa udaba lolu.”
Ulobe lenkundleni yokuxhumana eyeTwitter esithi akulamuntu olimeleyo engozini le njalo ulahlekelwe yimpahla enengi esele izimvuthu.
Kasenelisanga ukukhuluma lesikhulumeli samapholisa, uAssistant Inspector Paul Nyathi, obengaphenduli umakhalekhukhwini.
UMusengezi waphenyeka udaba emthethwandaba ekhonona ngokungena kuka Mnangagwa esikhundleni esithi kangenanga ngemfanelo kulandela ukugenqulwa esikhundleni kowayengumongameli, umuyi uRobert Mugabe.
Uthi uMnangagwa labanye bakhe bazingenisa ezikhundleni lezi kungenziwanga umhlangano oweCongress ngomnyaka ka2017.
UMugabe wagenqulwa libutho elathi lidinga iziqoqodo ezazimgombolozele. Kuze kube namhlanje akula ngitsho loyedwa okwakuthiwa ugangile owavalelwa entilongweni kulandela ukususwa kuka Mugabe esikhundleni.
UMusengezi usanda kuphanyeka elinye njalo icala alethesa uMnangagwa abanye bakhe abafuna ukuthi kwenziwa umhlangano omkhulu lonyaka oweCongress.
Uthi bonke abaqoqa umhlangano lo ngabantu abangena ngemfanelo ezikhundleni ngakho umthethwandaba kumele wethule isinqumo sokuvimba umhlangano lo.
Kukhengelelwe ukuba udaba lolu luzathoniswa lidale leHigh Court kunsukwana ezilandelayo.