Abehofisi yommeli weZimbabwe kwele South Africa sebesungule umkhankaso wokusiza bonke abantu abafuna ukuthola amabirth certificate lama phasipoti kwele South Africa.
Isiphathamandla sehofisi le, uConsul General Melody Chaurura, utshele iStudio 7 ukuthi umkhankaso lo, bawusungule ngemva kokubona ukuthi liyanda kakhulu inani labantu abafuna ukuthatha amaphasipoti lencwadi zokuzalwa.
Uthi lobanje bengeke batsho ukuthi sebehlangene bonke bangaki abantu abafuna amaphasipoti lencwadi zokuzalwa, emavikini amathathu edluleyo izikhala zonke ebezivulelwa abafuna lezi incwadi bezihle zithathwe emizuzwini elitshumi.
UNkosikazi Chaurura uthi kusukela mhlaka 3 Mfumfu kuze kuyefika umhlaka 17, inani labafuna amaphasipoti lencwadi zokuzalwa abasizwa yile ihofisi ngosuku, lizakwengezwa lisuka kwabangamakhulu amane (400) liye kwabayinkulungwane (1000). Sikhathi sinye lihofisi izavulwa ngoMgqibelo langeNsonto .
Abafuna lezi incwadi bakhangelelwe ukubhalisa kukhasi leConsulate ebulenjini be internet ukuze baphiwe isikhathi lelanga abazafika ngalo kula amahofisi.
Uthi bacabangela ukuthi ukwanda kwezizazalwane zeZimbabwe ezifuna lezi incwadi kweleSouth Africa kungabe kubangelwa yikuthi inengi selibona ukuqakatheka kokuba lencwadi ezisemthethweni kanti abanye ngabafuna ukusebenzisa lezi incwadi ukufaka izicelo zeminye imihlobo yamapermit.
Inengi lezizalwane zeZimbabwe selemukele leli nyathelo ngezandla zombili besithi lokhu kuzasiza kakhulu ukulungisa inhlalo yabo kweleSouth Africa.
Isizalwane seZimbabwe njalo elwela amalungelo abesifazana unkosazana Victress Mathuthu, uthi le yinto engcomekayo kakhulu ngoba lezi zincwadi eziqakatheke kakhulu kulabo abafisa ukuhlala kweleSouth Africa ngokusemthethweni.
“Njengoba sekunjalo sibhekele ukuthi njengoba kuthiwa umthamo mude owabantu abafuna ukufaka lezo zicelo, sizabona lowo mthamo usehla njengoba kuzasetshenzwa ngezikhathi ezifunukuba zinde, lalaba abasebenza Phakathi kweviki bakwazi ukuthi ngempelaviki bafinyelele eConsulate khonangale.”
Esinye isizalwane seZimbabwe, uMnu. Mlungisi Tshabalala, uthi lobanje kusaziwa ukuthi uhulumende usebenzisa loluhlelo ukuthola imali, lithuba lokuthi bonke abadinga lezi incwadi basukumele phezulu.
“Kuyathokozisa ukuzwa ukuthi bazayenza mpela beze besebenze langama weekend. Kungakho ngizabiza bonke abantu basukume abafuna uku aplaya ama phasipoti loba singazi ukuthi azothatha isikhathi esingakanani ukuthi bawathole.”
Esinye isizalwane seZimbabwe, UMnu. Greatman Mkhwebu, uthi kuqakathekile ukuthi loluhlelo lwethulwe ndawonye lenguquko kundlela okufakwa ngayo izicelo ikakhulu ukuthi useSouth Africa besekuthiwa zihambisele eZimbabwe amafomu akho owagcwalisileyo wawabhadalela.
“Eqinisweni ma bekungabe iConsulate iyabamela abantu baseZimbabwe bekumele ukuthi umuntu a aplayele iphasipoti ayithole khonalapho. Manje inkinga yikuthi I backlog ngeke yaphela ngoba yonki ihamba ngonyawo lukanwabu. So, ngibona engathi ayikho into ezatshintsha ngoba vele inkinga izahlala ikhona.”
Abafuna zonke ezinye incwadi kulihofisi bazaqhubeka besizwa ngezikhathi zekuseni phakathi kweviki.
Unkosikazi Chaurura uxwayisa izizalwane zeZimbabwe ukuthi zingavumi ukuqilwa ngamasela abhadalisayo abantu ukubatholela izikhexe zokuya kulihofisi ebulenjini beinternet ngoba lokhu kwenziwa umuntu engahlawulanga ngitsho lesenti elesikhala.
Facebook Forum