amalinks wokungena

Breaking News

Amapholisa Athathela Impahla Abaphila Ngokuthengisa Okungekho Emthethweni koBulawayo


Amapholisa aweBulawayo Municipal Police bethathela abaphila ngokuthengisa impahla

Abaphila ngokuthenga lokuthengisa izilimo inengi labo abayibo abathathelwe impahla yaboNgoLwesibili bayakusola lokhu besithi amapholisa atshona exotshanisana labo kodwa etshiya abathengisa utshwala lezidakamiza.

Bulawayo..............

Amapholisa aweZimbabwe Republic Police amanyene laweBulawayo City Council NgoLwesibili, kuhlelo lokuthathela abantu abathengisa okungekho emthethweni emnkambo yezilimo enzikini yedolobho bethi balwisana lezephulamuthetho kanye lokulondoloza idolobho lihlanzekile.

Abaphila ngokuthenga lokuthengisa izilimo inengi labo abayibo abathathelwe impahla yaboNgoLwesibili bayakusola lokhu besithi amapholisa atshona exotshanisana labo kodwa etshiya abathengisa utshwala lezidakamiza.

Umkambo wezilimo enzikini yedolobho isilabantu abanengi abaphila ngokuthengisa okungekho emthethweni osekudala isiminyeminye lengcekeza ndawana yonke.

Isikhulumi samapholisa iZimbabwe Republic Police, uInspector Abednico Ncube uthi bekungasahambeki emnkambo wezilimo.

“Njengamapholisa size lapha ukuzoqondisa konke obekungasahambi kahle kule indawo ngoba abathengisa okungekho emthethweni bebesebevala indlela ilanga lonke bethengisela emgwaqweni bengalandeli umithetho yedolobho.”

Uqhubekele phambili ethi inengi labathengisayo bebethengisa okungekhi emthethweni.

“Abanye babo bathengisa utshwala lezidakamizwa eziyingozi kwabasakhulayo lomphakathi.”

Ophila ngokuthengisa othathelwe impahla uMnu Pangolin Moyo usola ukuthathelwa impahla ngamapholisa.

“Ekuseni kufike amapholisa athathela wonke umuntu impahla ethengiswayo lami nginje ngithathelwe amabhanana lokunye engikuthengisayo.”

Omunye njalo othathelwe impahla akade ezithengisa, uMnu Tichi Kiti uthi amapholisa athethe konke kodwa batshiya abathengisa okudakayo.

“Amapholisa afike asithathela impahla kodwa abazange bathathele abathengisa utshwala lezidakamizwa esesikucela yikuthi uhulumende angenele ngoba siphila khonapha emgwaqweni.”

UBulawayo uselabantu abanengi abaphila ngokuthengisa impahla ezehlukeneyo enzikini yedolobho kulandela ukuswelakala kwemisebenzi kubangelwa yikungamanga kuhle kwesimo somnotho elizweni esibone amafekithali amanengi evalwa edolobheni elalisaziwa ngokuthi kukontuntu ziyathunqa ngentuthu eyayiphuma kumankampani ayelungisa impahla etshiyeneyo.

Inengi labaphila ngokuthengisa basola inyathela lokuthathelwa impahla bethi yikho lapho abaphilakhona ngakhoke bacela uhulumende ukuba abadingele ezinye indlela zokuthi kube lokusebenzalana lozulu ukuthuthukisa inhlalakahle yabantu lomnotho welizwe.

Facebook Forum

XS
SM
MD
LG