amalinks wokungena

Breaking News

EleSouth Africa Selidinga Abantu Bokuza Abalemitshado Eyabenza Bathola Amaphepha Okuhlala Lokusebenza Kulelolizwe


UMnu. Aaron Motsoaledi

Umphathintambo wogatsha lwendaba zasekhaya kwele South Africa, uMnu. Aaron Motsoaledi, uthi baphakathi kohlelo lokuvumbulula imitshado lamaphasipoti okwenziwe ngokungekho emthethweni yilabo abangayisizo zizalwane zakwele South Africa.

UMotsoaledi utshele abezindaba ukuthi kusukela ngoZibandlela lonyaka, ugatsha lwendaba zasekhaya selubambe imitshado yamanga edlula amakhulu amahlanu (553) yahle yesulwa.

Banengi abakwamanye amazwe abathe ngokuswela incwadi zokuhlala kwele South Africa badinga imitshado ezakwenza bathole incwadi zokuba kwele South Africa ngokusemthethweni.

FILE - Banengi abadabuka eZimbabwe abadinga amaphepha okuhlala lokusebenza kwele South Africa
FILE - Banengi abadabuka eZimbabwe abadinga amaphepha okuhlala lokusebenza kwele South Africa

Kwesinye isikhathi imitshado le yenziwa ngezithupha ezilahlekileyo umnikazi aze akwazi ukuthi utshadile nxa esefuna okuthile emahofisini ezithupha.

Abanyeke ngabatshada lomuntu bahlawulane imalinje kuphela kodwa bengathathani.

UMotsoaledi uthi bazingela njalo abasebenzisa amaphasipoti athethwe ngudlu ngoba lokhu kungcolisa isithunzi sephasipoti yakwele South Africa.

Uthi baphakathi kwehlelo zokuqinisa imithetho ukuze kungabi lula ukuthi umuntu athole incwadi yamanga kwele South Africa.

UMotsoaledi uthi phezu kokusebenzisa umpikitsha lama finger print omuntu, sebethatha lomfanekiso webhola lelihlo okuyinto okuzaba nzima ukuthi umuntu ayiphe omunye ngoba uzathi ungena elizweni kuhlolwe wonalawo amehlo akho besekuqathaniswa ukuthi ayahambisana yini lokukuphasipoti yakho.

UMotsoaledi uthi phansi kwalo umkhankaso sebehlolisise amaphasipoti amanga aphose afike ikhulu bahle bawavala ukuze engasasebenzi.

Uthi sebecabange njalo ukwethula ugwalo olulodwa olulemitshado yonke oluzabe lulemifanekiso, lama finger prints abathetheneyo labo.

Isizalwane seZimbabwe, uMnu. Greatman Mkhwebu, uthi akuthandabuzeki ukuthi indaba yokuhlolisiswa kwemitshado le lamaphasipoti izathinta kakhulu izizalwane zeZimbabwe njengoba vele bekhona abangene kulokhu labo bezizamela impilo.

“Ngibona engathi isimo sithanda ukuba manzonzo manje umkhumbi uyacwila. Ngoba ma wayekhuluma kuqala bengicabanga ukuthi uyazikhulumela kodwa sengiyezwa ukuthi isandla siyaqinala. Eqinisweni especially thina abantu base Zimbabwe sizahlukumezeka kakhulu. Ngoba imitshado eminengi ibitholakala ngezincwadi zaseSouth Africa langezinye indlela mhlawumbe esingazaziyo. Kodwa-ke umuntu ma wayekhangelele ukuthi usezinzile lapha eSouth Africa unomsebenzi nemali emabank, ngibona engathi kuzabheda lapha.”

Loluhlelo luqhutshwa ngesikhathi lapho kulezizalwane zeZimbabwe eziphose zifike inkulungwane ezingamakhulu amabili (180,000) osekuthiwe zifune olunye uhlobo lwamapermit kumbe ziphume ziphele emzansi.

Ngesikhathi kuphiwa amapermit ohlobo lweZimbabwe Exemption permit, la azaphelelwa yisikhathi ngoNhlangula womnyaka ozayo, bazinkulungwane eziyisithupah abeZimbabwe ababasebenzisa izithupha zakweleSouth Africa bezithethe ngokungekho emthethweni, abazilethayo basebethatha amapermit eZEP.

Inengi labantu abalamapermithila bayehluleka ukufaka izicelo zamanye amapermit kusitsho ukuthi bangazibona sebephindela ekhaya ngoNhlangula.

Ngasikhathi sinye ugatsha lwezemisebenzi lalo luphakathi kokwethekelela amankampani luhlola ukuthi kambe izisebenzi zonke zilayo yini imvumo yokuba selizweni.

Ngakolunye uhlangothi amaqembu atshiyeneyo ezizalwane zakweleSouth Africa kugoqela lamabandla ezombusazwe labo sebeqale imikhankaso etshiyeneyo ehlose ukubamba ngamandla abakwamanye amazwe ukuthi babuyele kubo bebethesa umlandu wokubathathela imisebenzi lokudala amacala.

Facebook Forum

XS
SM
MD
LG