amalinks wokungena

Breaking News

Uhulumende Uthi Kumele Intathelizindaba Ziqhube Umsebenzi Zikhululekile eZimbabwe


Monica Mutsvangwa, Zimbabwe's Information Minister.

Umphathintambo wezokwethulwa kwemibiko uNkosikazi Monica Mutsvangwa utshele iStudio 7 ese Kadoma ukuba akathokozi ngokuhlukunyezwa okwenziwe uMangudya, yena otshaywe kabuhlungu ngabasekeli beZANU PF ngesikhathi esiyathapha udaba lokhetho lwedale laphezulu lalelo bandla ele Central Committee

Uhulumende we Zimbabwe uthi intathelizindaba kumele ziyekelwe ziqhube umsebenzi wazo zikhululekile njalo zivikelekile.

Lokhu kuza ngemva kokutshaywa kwe ntathelizindaba ye Studio 7 esebenza izimele uGodwin Mangudya.

Umphathintambo wezokwethulwa kwemibiko uNkosikazi Monica Mutsvangwa utshele iStudio 7 ese Kadoma ukuba akathokozi ngokuhlukunyezwa okwenziwe uMangudya, yena otshaywe kabuhlungu ngabasekeli beZANU PF ngesikhathi esiyathapha udaba lokhetho lwedale laphezulu lalelo bandla ele Central Committee.

UNkosikazi Mutsvangwa uthe uhulumende kathokozi nxa intatheli zitshaywa lokuhlukunyezwa njengalokho okwenziwa uMangudya.

“Ngiyadana kakhulu ngodaba lokuhlukunyezwa kwentathelizindaba. Ugatsha engilusebenzelayo sihlangana labaku ntatheli ukuba sibone ukuba indaba zabo ziyalungisa. Udaba lolu lusasemapholiseni sifuna ukuba sizwe ukuba kuyini okwenzakalayo”

UMnu Nqaba Matshazi owenhlanganiso ye MISA-Zimbabwe uthi isimo sokutshaywa kuka Mangudya, lezinye izehlakalo zokuhlukunyezwa kwentatheli kumalanga asanda kwedlula zitshengisa ukunga hlonitshwa kwamalungelo enthatheli e Zimbabwe.

“Esikubona kusenzakala yikuthi nxa siqathanisa lumnyaka lomnyaka osanda kwedlula sibona ukuba indaba lezi ziyala ziqansa. Nxa sikhangela ukuthi nxa kulokuhlukunyezwa lokhu kutshengisa ukuba u2023 engaba nzima”

Lokhu kugcizelelwe nguNjabulo Ncube owenhlanganiso yabahleli bezindaba eye Zimbabwe National Editors Forum.

“Sesike sazama ukukhulumisana lohulumende.. Kodwa kusobala ukuba kumele siyale sikhulumisana labo. Intathelizi ezinengi ziyahlukunyezwa, kusegcekeni ukuthi kumnyaka ozayo kuzakuba nzima”

UKovedzai Takawira ongunobhala wenhlanganiso yentathelizindaba ezisachathulayo, eye Young Journalists Association uthi ukutshaywa kuka Mangudya kuyisikhumbuzo sochuku olulakho ukwehlela intathelizindaba ngomnyaka ka 2023.

“Kulihlazo ukuba intatheli ziyahlukunyezwa. Ngendlela okuyiyo yona kutshengisa ukuba bayehluleka ukuma lalokho abasithembisa khone ngesikhathi bengena esikhundleni”


Inhlanganiso ezimele amalungelo entathelizindaba ezigoqela eye Media Institute of Southern Africa (MISA) zithi ukukhuphuka kwezehlakalo zokuhlukunyezwa kwentathelizindaba, ukwethuselwa lokubotshwa kwazo kuzaqhubekela phambili ikakhulu khathesi sokulungiselelwa ukhetho lomnyaka ozayo.

Lokhu sokutshiye intathelizinda zilokwesabela impilo yazo ngoba zingasela ndawo yokucatshela ngenxa yomumo okhona elizweni ngesikhathi ilizwe lilungiselela ukhetho lomnyaka ozayo luka Mongameli, abammeli bedale lephalamende labamakhansili.

Isikhulumeli samapholisa uMnu Paul Nyathi ube engasabeli ucingo kodwa omunye umpholisa wenkambeni yeKuwadzana ugcizelele ukuthi udaba lolu lumangalwe kibo phansi kwe nombolo yeRRB ethi 5303763.

UGodwin Mangudya utshaywe ngamampama ngabasekeli beZANU PF emzini weKuwadzana, eHarare ngesikhathi ethapha izindaba zokhetho ledale leCentral Committee yebandla leli.

Lokhu kusenzakala eyinye intathelizindaba eye phephandaba le Newsday uDesmond Chingarande laye uxotshwe kweyinye indawo ebisenzelwa ukhetho lolu eMasvingo.

Kusenjalo kolunye udaba olufanayo, namhlanje intathelizindaba ze Heart and Soul ezibalisa u Gaddafi Wells lo Dunmore Mundai bathi batshaywe kabuhlungu ngamapholisa e Mbare namhlanje.

Baphinde babotshwa basiwa enkambeni ye Mbare kodwa baphanga bakhululwa bengetheswanga cala.

Facebook Forum

XS
SM
MD
LG