amalinks wokungena

Breaking News

I-Zimbabwe Imanyana Lomhlaba Ukunanza Ilanga Lokuqakathekiswa Komntwana Oyinkazana, eleInternational Day of the Girl Child


Emhlabeni wonke jikelele, amankazana aleminyaka engaphansi kwelitshumi lasitshiyangalombili, ahlangana lenhlupho ezitsheyeneyo ezigoqela ukungabhadalelwa indleko yemfundo ngabazali abaswelayo bekhetha ukubhadalela ongumfana, ukwendiswa besesebancane lokunye

WASHINGTON DC............EleZimbabwe namhlanje limanyene lamanye amazwe womhlaba ukunanza usuku lokuqakathekiswa kokuthuthukiswa komntwana oyinkazana olweInternational Day of the Girl, olunanzwa minyaka yonke mhlaka 11 Mfumfu. Loluhlelo lwasungulwa ngomnyaka ka 2011, ngemva kokunanzelela inhlupho ezibhekane lomntwana oyinkazana kungakhathalekile ukubana ngowasiphi isizwe.

Emhlabeni wonke jikelele, amankazana aleminyaka engaphansi kwelitshumi lasitshiyangalombili, ahlangana lenhlupho ezitsheyeneyo ezigoqela ukungabhadalelwa indleko yemfundo ngabazali abaswelayo bekhetha ukubhadalela ongumfana, ukwendiswa besesebancane, ukusetshenziswa njengezigqili abanye njalo besetshenziswa ukuphila ngokuthengisa imzimba yabo.

Kwele Zimbabwe kulezinye inhlanganiso lezinkonzo ezendisa amantombazana angaphansi kweminyaka evunyelwayo emthethweni. Eminyakeni emibili edluleyo, sokubhubhe amantombazana amathathu ebeletha aphume ezindabeni kodwa ingcwethi zezenhlalakahle kazulu zithi banengi ababhubha ngale indlela abangaphunyiswayo ezindabeni.

IStudio 7 ixoxe lomqondisi wenhlanganiso yeZimbabwe Gender Commision ezigabeni zeMatabeleland uMnu. Dalubuhle Sibanda othe,

"Thina umsebenzi wethu ngenge-commission singathi yikukhusela lokuvikela, kanye lokubona ukuthi ubulili lamathuba phakathi kwabesilisa labesifazane buyavezakala. Lonyaka indikimba yelanga lokunanza umntwana oyintombazana ithi:, 'Our time is now; our rights, our future'. So thina njenge Zibabwe Gender Commission njengoba ngitshilo ukuthi lathi siyaphatheka namhlanje, siyahalalela, siphinde futhi sinaka imnyaka elitshumi lapho okwasungulwa khona lelilanga yiUnited Nations General Assembly."

USibanda ubuye wathi: "Ungananzelela isisekelo sethu sombuzo siyananzelela ukuthi wonke umuntu noma engumuntu wesifazana kumbe kungumuntu wesilisa, bayalingana."

USibanda uphethe ngokuthi ilizwe leZimbabwe lilomthetho ethiw yi-Child Protection and Adoption Act, leMarriages Act le esikhona engeminye imigoqo emitsha efakwe nguhulumende, efaka isithembiso sokuthi umntwana oyinkazana aphuselwe.

"Umthetho lo, nxa usukhona sokunje, abantwabethu abanga mantombazana sikhangele ukuthi baphephe ekuhlukunyuzweni lokhu, lokwendiswa besasebancane, ukuhlukunyezwa kubocanci lalokhu okunenginengi okujayele ukuthi abantwana abanga mankazana bahlangane lakho." Kugqiba uSibanda

Facebook Forum

XS
SM
MD
LG