WASHINGTON DC.............
Amapholisa awe Zimbabwe Republic Police abike ngengozi embi yebhasi egenquke izolo ntambama emgwaqweni oxhuma iNyanga-leRusape, esigabeni seManicaland, ithwele abantwana besikholo seTynwald.
Abantwana abayisithupha, abagoqela abangamantombazana abahlanu lomfana oyedwa, abakade bekulibhasi bahle bafela khonapho. Abangamatshumi phose amane-39, bagijinyiselwe ezibhedlela zeNyanga lase Victoria Chitepo Hospital, eMutare. Abantwana laba abesikolweni se-Tynwald High School esiseHarare, bebelubhekisa eNyanga kuhlelo lwabantwana besikolo lokuvakatshela indawo ezitshiyeneyo zelizwe.
Umtshayeli ubikwa ehleuleke ukujika, ibhasi yagiqika entabeni yaze yayama isilele ngophahla.
Ekhuluma enkundleni yobulembu eye-Twitter, umeli wesigabeni seNyanga South, edale lephalamende, uMnu. Supa Mandiwanzira uthe ulusizi ngomonakalo ongaka. Kodwa wahle waphanga wathi uthanda ukubonga izakhamizi zalumango weNyanga/Mutasa, ezihle zaphanga ukuncedisa ukuhlenga abasinde kule ingozi, njalo labezimota ezithwala abalimeleyo ebezivela ezibhedlela zeNyanga leMutare eziphange zafika zathwala abantwana.
IStudio 7 ikhulume lomnumzana James Brown isakhamuzi saseNyanga othi abakabi kwazi imbangela yale ingozi.
“Ingozi eyenzakale eNyanga eyabantwana abakade besiya ku-trip from Harare ibidabukisa sibili. Ibiyingozi ethinte phose ilizwe lonke. Ibiyinto ebuhlungu sibili. Kodwa, I think, in the future, ama-driver should observe ama-signs, ama-road-signs because where you need to engage to lower gears, kumele ulandele wonalowo mthetho. Khona asikabikwazi ukuthi iphutha lona belingelomtshayeli kumbe belingayona ibhasi ebingalungiswanga kuhle, kumbe ngumtshayeli. Kutsho uMnu. Brown
Eqhubeke esithi: “Kodwa inkalakatha, imango leyana siyayazi. Yimango elezintaba, yimango elama-curves. So kuyabe kumele lawe nxa unguwe uphethe impefumulo yonke leyana oyabe ulayo ebhasini, ube ngumuntu lawe ozithonisisayo at every step of the way. Ube ngumuntu oyaziyo ukubana, nxa ususesibangeni esingakanani, kumele wenze njani.”
UBrown ucine ngokuthi, ingozi ziyenzakala, kodwa kumele abatshayeli baqaphele njalo bahambe ngonanzelelo emigwaqweni yelizwe jikelele. Uthe izakhamizi zeNyanga zikhala lemuli ezilahlekelweyo kulingozi.