amalinks wokungena

Breaking News

Abacatshangelwa Ukuba Ngamalunga eZanu PF Bahlasela Abakubandla leCitizens Coalition for Change eMatobo


Omunye wabesifazana otshaywe ngabacatshangelwa ukuthi ngamalunga ebandla leZanuPF eMatobo.

Abacatshangelwa ukuba ngamalunga ebandla leZanu PF bahlasele abebandla leCitizens Coalition for Change (CCC) ngeSonto eMatobo esabelweni seMatabeleland South ngesikhathi bekhankasela ukhetho lwe-byelection kuWard 2 oluzayo.

Batshaye uMnu. Kucaca Phulu, omele iNkulumane edale lephalamende, kwathi omunye wakhe, uMnu. Daniel Molokele wabaleka waze wahlengwa ngabanye abantu eMatobo.

Kulamalunga ebandla leCCC athi alimele okumangalisayo. Omunye wabo kukhanya wephuke imbambo ezimbalwa njalo watshaywa ngemvubu lengenswazi wagandwa ngamatshe.

Abakubandla leli bathi abantu laba akade behamba ngemota ezinengi, bagande ngamatsha bagamula langamahloka imota kaPhulu.

Okwamanje uPhulu lamanye amalunga eCCC basesibhedlela. UMolokele laye ucatshile kweyinye indawo abangayivezanga besenzela ukuba engahlaselwa okwesibili.

Isikhulumeli sebandla leCCC, uNkosazana Fadzayi Mahere, uthi kulabesifazana abathathu abanqunulwe ngabantu laba obekusobala ukuba bathunywe libandla elibusayo ukuba beyevimba eMatobo okuzakwenziwa khona ukhetho lwe-byelection ngempelaviki.

Asenelisanga ukukhuluma ngodaba lolu leziphathamandla zebandla leZanu PF akade bengaphenduli omakhalekhukhwini.

Facebook Forum

XS
SM
MD
LG