Amalunga ebandla leCitizens Coalition for Change ayisikhombisa abikwa ethwalelwe esibhedlela seFilabusi izolo, kwathi abayisithupha badluliselwa koBulawayo, ngemva kokulimala kulandela ukuhlaselwa ngabacatshangelwa ukuthi ngamalunga ebandla leZanu PF izolo eInsiza South lapho abakade besemhlanganweni lekhomishini yeZEC.
Abathwalelwe esibhedlela kobulawayo ukuze bayehlolwa ngemitshina yama X-rays, bagoqela ilunga ledale lephalamende uNkosikazi Jasmine Toffa, lomunye ukhansila ongaqanjwanga igama.
Lokhu kuvezwe ngumgcinisihlalo webandla leccc ematabeleland south umnu. Solani njemnyama moyo yena othi utshayele imota yakhe wayabahlenga einsiza wasebathwalela kobulawayo.
Uthi okudanisayo yikuthi abahlasela amalunga ebandla lakhe bakhuluma ulimi lwesishona okuveza sobala ukuthi abaveli esigabeni sabo.
Lokhu kuza ngemva kodlakela phose olufanayo oluqhamuke ematopo ngesonto. Kukhangelelwe ukuqhutshwa ukhetho lwama by-elections ematobo leinsiza ngoMgqibelo.
Umgcinisihlalo webandla leZanu PF, uMnu. Nqobizitha Mangaliso Ndlovu utshele uSithandekile Mhlanga weStudio 7 ukuthi lanxa ekhuthaza ukuthi kube lokuthula, njalo kulindelwe impumela yokudingisisa kwamapholisa, kuyamangamalisa ukuthi imifanekiso yama video ebonakala ebulenjini ayitshengisi udlakela lusenzakala, kodwa sokuthiwa lwenzakele.
Kodwa omunye wakhe weCCC uMnu. Solani Njemnyama Moyo uthi uyawasola amazwi kaMnu. Ndlovu ngoba wazibonela ngawakhe okwenzakalayo.
Amapholisa athi ayasola udlakela lolu. Embikweni owethulwe izolo enkundleni yokuxhumana eye Twitter, amapholisa athi ayacubungula loludlakela.
Isikhulumeli samapholisa uAssistant Commissioner Paul Nyathi ukhuze abamabandla ezombusazwe ukuthi angaphehli udlame.