WASHINGTON DC - Ibandla eliphikisayo eleCCC lithi amalunga alo atshaywe ngabantu abacatshangelwa ukuthi ngabasekeli beZanu PF eInsiza ngoMvulo alimele kakubi njalo amanye awo ahanjiswe ezibhedlela.
Abalimeleyo bagoqela umeli wakoBulawayo edale lephalamende uNkosikazi Jasmine Toffa. Udlakela lolu lulandela ukuhlaselwa njalo kwabasekeli beCCC eMatobo ngeSonto.
Ibandla leli lithi uToffa utshaywe wathathelwa isikhwama esilemali kwathi imota yakhe yabulawa amafasitela njalo yathelwa inhlabathi ku-engine.
Ibandla leZanu PF liyakulandula ukuthi yilo elidale loludlakela njalo iziphathamandla zalo zitshele amapholisa ukuthi abasekeli balelibandla labo batshayiwe ngamalunga eCCC.
Udlakela lolu lwenzakala phambilini kokhetho lwamakhansila eInsiza laseMatobo ngempelasonto, olwama-by-elections.
Inhlanganiso ezilwela amalungelo ezigoqela IZimbabwe Human Rights NGO Forum leZimbabwe Lawyers for Human Rights zisole kakhulu iZanu PF phezu kwaloludlakela.
Inhlanganiso ekhankasela ukuqhutshwa kokhetho olukhululekileyo eyeZimbabwe Election Support Network (ZESN) layo ilusilele loludlame yaxwayisa amabandla womabili ukuthi akhulumisane.
Umsekeli wesikhulumeli seCCC uMnu Gift Ostallos Siziba utshele iStudio 7 ukuthi bakhangelele ukunqoba kukhetho lwangempelasonto kungelani laloludlakela.
Ilunga leZanu PF Central Committe, uMnu Joseph Tshuma, yena uthi uyalusola lonke udlame kungakhathalekile ukuthi luvela kubandla lakhe kumbe kubandla leCCC.
Ukuhlaziya loludaba sixoxe legqwetha uMnu Kuda Hove, yena othi udlakela lolu luveza sobala ukuthi kuzaba lodlame olumangalisayo kukhetho lomnyaka ozayo.
Isikhulumeli samapholisa uMnu Paul Nyathi uthi basaphenya ukuthi kwenzakaleni kahle-kahle kuzehlakalo zombili.