Ibandla leZanu PF linqobe eleCitizens Coalition for Change ezigabeni ezinhlanu kukhetho lwama by-election olwenziwe ngoMgqibelo.
IZimbabwe Electoral Commission ibika ukuba ibandla leZanu PF linqobe esigabeni seInsiza, Matobo, Buhera, Takawira eNkabazwe leGuruve.
Ibandla leCCC lona linqobe eMutare esabelweni seManicaland.
KuWard 4 esigabeni seInsiza, uMnu. Daniel Dube owebandla elibusayo uthole amavoti afika phose amakhulu ayisithupha – 578 kwathi uMnu. Augustine Gumede oweCCC wathola amavoti edlula kancane amakhulu amane – 415.
EMatobo kuWard 2, uMnu. Fadreck Siwela okubandla leZanu PF uthole amavoti afika phose inkulungwane – 934 kwathi uMnu. Sindiso Ngwenya, obemele ibandla leCCC, wathola angamakhulu amabili lamatshumi ayisikhombisa – 270.
UMnu. Liberty Nyirongo, obemele ibandla leZapu, uthole amavoti angamatshumi amabili lanhlanu – 25.
KuWard 18 eMutare, uMnu. Blessing Marindashaka, okubandla leCCC, uthole amavoti edlula kancane amakhulu ayisikhombisa – 711 kwathi uNkosazana Loveness Chiwashira, okubandla leZanu PF, wathola afika phose amakhulu amahlanu – 478.
UMnu. Nyasha Machekeche, obemele ibandla leNational Constitutional Assembly ekhokhelwa nguMnu. Lovemore Madhuku, othele amavoti afika phose amatshumi amathathu.
UMnu. Belive Gaule uthi ukunqoba kwebandla elibusayo kuveza ukuthi ibandla leli lizanqoba kukhetho oluzakwenziwa ngomnyaka ozayo.
Kodwa uMnu. Ostallos Siziba, umsekeli wesikhulumeli sebandla leCCC, uthi ibandla leZanu PF lethusele uzulu kungakenziwa ukhetho.
Lokhu kusekelwa nguMnu. Msongelwa Ndlovu, isikhulumeli sebandla leZapu.