amalinks wokungena

Breaking News

Uhulumende kaMnangagwa Ulungiselela Ukunanza Usuku Lomkhankaso Wokusola Izijeziso Zenotho Ezetheswa Inkokheli yeZanu PF


Omunye webakhankasela ukuthi zesulwe izijeziso zenotho ezetheswa inkokheli yebandla leZanu PF, Oct. 19, 2022.

BULAWAYO - EleZimbabwe likhangelelwe ukuba kusasa lizaqhuba umkhankaso wokulwisana lezijeziso zenotho ezafakelwa inkokheli yebandla leZanu PF ngamazwe entshonalanga.

Umkhankaso lo, osekelwa yinhlanganiso yeSouthern African Development Community, uqhutshwa minyaka yonke ngesikhathi lesi.

Kukhangelelwe ukuba amalunga ebandla leZanu PF labanye bemanyane leSADC bazatshengisela emigwaqweni eHarare, Botswana, South Africa lakwamanye amazwe besola izijeziso zenotho ezafakelwa inkokheli yebandla leZanu PF, okuthiwa yephula ilungelo loluntu njalo iqhuba ukhetho olungakhululekanga.

Abakunhlanganiso yeSADC kwele Botswana bakhangelelwe ukuba labo bazangena emigwaqweni beveza ukuba abahambelani lezijeziso lezi. EleMelika lithi kalisoze lesule izijeziso lezi kuze kulungiswe ezokhetho lokunye kwele Zimbabwe.

UMongameli Emmerson Mnangagwa, njengowaye ngumongameli umuyi uRobert Mugabe, ukhala ngezijeziso lezi esithi zibhidliza umnotho welizwe. Kodwa amazwe entshonalanga athi ibandla leZanu PF lenza santando eZimbabwe.

Umkhankaso walonyaka uqhutshwa phansi kwesihloko esithi: Enhancing Zimbabwe’s Resilience through Economic Development and Engagement and Re-engagement. Ugatsha lwezemfundo lwethule umbiko izolo lusithi kumele ababalisi bekhumbule usuku lolu. Kodwa abanye ababalisi bathi abasoze bekwenze lokhu ngoba kulabantwana abaloba imihloliso etshiyeneyo.

UMnu. Thembakuye Moyo, isikhulumeli seAlmagameted Teachers Union of Zimbabwe, uthi uhulumende kumele adinge ezinye indlela zokunanza usuku lolu hayi ezikolo ngesikhathi semihloliso.

“Kuyasidanisa kakhulu ukuthi ngesikhathi semhloliso izikolo labantwana uhulumende ufuna ukukusebenzisa ukuba kuphatheke kuhlelo lwakhe lwamasanctions. Okokuqala abantwana kanye lezikolo asosigchawu sezopolitika,uhulumende wenza iphutha kakhulu. Amasanctions ungawadinga ahamba lemgomo lembhandela kukhona okumele kwenziwe nguhulumende hayi ukuthi atshone ebuthanise abantwana betshaya izilogani zamasanctions. Uhulumende kayenze amareforms okumele ayenziwe kudlule kithi ebabalisini lebantwaneni siyamcela siyamgcenga ukuthi angasondeli ngoba silomsebenzi omkhulu wokubona ukuthi abantwana bayabhala imhloliso kungela kuphazamiseka.”

UMnu. Goodwill Taderera, obambe okwesikhatshana isikhundla sikanobhala jikelele wenhlanganiso yeZimbabwe Teachers Association, uvumelana laye.

“Thina asisilo qembu lezombangazwe njalo siyakholwa ukuthi ababalisi bethu abakho kwezombangazwe ngoba uhulumende laye ngokwakhe uyakutsho ukuthi ababalisi akumelanga bakwenze lokho kanye lezikolo, kodwa ngenxa yokuthi sisebenza ngaphansi kukahulumende sizibona sesisenza loba yini abayifunayo.Sisebenza ngaphansi kukahulumende asikhangelelanga ukuthi okuzakwenzakala kube ngokwezombangazwe.”

UNkosikazi Sanele Nyoni, omunye wabazali olomtwana obhala imihloliso, uthi uhulumende kumele ahloniphe imihloliso yabantwana.

“Kuyadanisa ukuthi khathesi abantwana baphakathi kokubhala imihloliso kodwa uhulumende ufuna ukubaphambanisa. Abantwana laba asikhangelelanga ukuthi baphazamiswe ngoba bavele baphazamiseka kudala kuyini vele abakufundayo ngama sanctions lathi kusehlula ukuzwisisa.Khathesi asikukhangelelanga konke lokhu amapaper ayaleaker yikho esikhangele ukuthi kubelokulungisiswa kikho hayi okunengi.”

UTaungana Ndoro, isikhulumeli sohlangothi lwezemfundo olweMinistry of Primary and Secondary Education, uthi abafundi kumele bephatheke emicimbini le.

“Kujwayelekile ukuthi ezifundweni yezijeziso zomnotho welizwe abafundi baphatheke.Kuzizalwane kulungile ukuthi bafundiswe bebancane kusukela ku Early Childhood kuhle kubesobala kukhanye ukuze labo baphatheke ekwenzeni izingqumo emphakathini.lzikolo kanye labantwana bazaphatheka kumgcimbi we anti sanction ozakwenzakala mhlaka 35 Mfumfu.”

Usuku lolu luzananzwa elizweni lonke jikelele kusasa njalo kulenhlelo ezimbalwa ezizakwenziwa ezigoqela iGala.

Facebook Forum

XS
SM
MD
LG