GABORONE - Kulehlekana labe Zimbabwe ebelibuthene ehofisini yommeli welizwe leli eseGaborone namuhla benanza usuku lokukhankasela ukwesulwa kwezijeziso zenotho olweSADC Anti-Sanctions Day.
Izikhulumi ngobunengi kulombuthano kade zilomlayezo othi kumele zesulwe izijeziso zenotho ezafakelwa inkokheli yebandla leZanu PF ngamazwe angentshonalanga.
Kodwa kumehluko leminye iminyaka, inengi lezikhulumi kade kuyizizalwane zeZimbabwe ezihlala eGaborone.
Umsekeli kommela iZimbabwe kwele Botswana, uMnu. Witness Ngwenya, utshele iStudio 7 ukuthi usuku lolu luqakathekeli ukuze kufakwe umfutha kumazwe ethesa abanye beZimbabwe izijeziso zenotho.
“Leli lilanga lokubambisana phezu kwezijeziso zenotho ezafakwa kuZimbabwe, yilizwe leAmerica lenhlanganiso yeEuropean Union. Lilanga lokuthi amazwe angezansi kweAfrica abambana ukuthi izijeziso lezi zisuswe, azincedi lutho njalo azikho emthethweni.”
UMnu. Cephas Tshuma, obemele iDiaspora Community, uthi sesifikile isikhathi sokuthi amazwe entshonalanga esule izijeziso zenotho lezi.
“Iminyaka isimnengi lokhe kukhulunywa ngendaba efana. Labo America lokhu akubantshintshi. IZimbabwe kayizame ukukhangela abangane abatsha abangaphakamisa iZimbabwe.”
UMnu. Njabulo Ncube, ohlala eGaborone ongenele umbuthano lo laye uyakhala ngezijeziso lezi.
“Iminyaka isimide, sekuncidezele uzulu weZimbabwe ngendlela ezitshiyeneyo. Abanye bangaze bebhubhe khonapha kunzima ukuthi sibuyisele izidumbu, abantwana bethu kabasela siko labo njalo kulimaza ezonotho."
Osakhulayo oleminyaka engamatshumi amabili lantathu, uNolwandle Ncube, uthi phose impilo yakhe yokhe useyiphile eleZimbabwe lingaphansi kwezijeziso zenotho. Uthi lokhu kwenza ukuthi abasakhulayo, bazibone bempofu kulabanye babo abasemazweni angomakhelwane.
“Nxa kukhulunywa ngama sanctions, kutsho iminyaka yami iphose ilingane lama sanctions. Sengikhulele elizweni elingayisilo lakithi okungibonisa ukuthi thina asilamathuba afana labanye abantwana bakwamanye amazwe.”
Izikhulumi zakwamanye amazwe kade zimbili kuphela lonyaka zigoqela omela ilizwe leCuba kwele Botswana, uMnu. Orlando Alvarez, kanye lomela iSaharawi, uMnu. Mohamed Samba. UAlvarez uthi njengabantu beCuba bayabazi ubuhlungu obubhekane labantu beZimbabwe ngoba ilizwe labo lingaphansi kwezijeziso zenotho.
Okweminyaka eminengi, eleCuba liphila ngaphansi kwezijeziso zenotho ezafakwa ngeleUnited States, lokhu ngokufana lokwenziwa elizweni lenu. Izijeziso lezi zayalwa ngamanye amazwe kodwa ziyafuqwa kuphela”
USamba uthi bazaqhubeka beme leZimbabwe kulezijeziso zenotho kumbe zingekho.