amalinks wokungena

Breaking News

Ukumemetheka Komkhuhlane Womlomo Lamasondo Ezifuyweni Kuzondisa uMasisi Labantu eBotswana


FILE - Inkomo zeqa umgwaqo eGaborone, Botswana, April 5, 2020.

EleBotswana likhala okumangalisayo ngoba lithengisa inyama emkambo wezwekazi leEuropean Union. Lithi ukuqhamuka komkhuhlane womlomo lamasondo kuphazamisa kakhulu ibhizimusi leli.UMasisi uthi eleBotswana lizatshengisa omakhelwane ukuthi alidlali phezu kodaba lokulwisana lomkhuhlane lo.

EleBotswana lithi lizakhulumisana kabanzi leleZimbabwe phezu kokuqhamuka komkhuhlane wezifuyo womlomo lamasondo – ifoot and mouth. Abafuya inkomo kwele Botswana bathi umkhuhlane lo umemethekiswa zinkomo zakwele Zimbabwe ezifohla umngcele.

UMongameli Mokgweetsi Masisi uthi useke wakhuluma loMongameli Emmerson Mnangagwa phezu kokukhathazeka ngokuqhamuka komkhuhlane womlomo lamasondo.

EleBotswana likhala okumangalisayo ngoba lithengisa inyama emkambo wezwekazi leEuropean Union. Lithi ukuqhamuka komkhuhlane womlomo lamasondo kuphazamisa kakhulu ibhizimusi leli.UMasisi uthi eleBotswana lizatshengisa omakhelwane ukuthi alidlali phezu kodaba lokulwisana lomkhuhlane lo.

“Umhlaba wonke jikelele kuzamele uvuke uzwisise ukuthi uma sikhuluma nge foot and mouth, asidlali. Sizabancedisa ngolwazi lokulwisana lomkhuhlane lo.”

Ekhuluma kumhlangano asanda kuwubamba labalimi, uMasisi uthi udlulisele umlayezo kuMnangagwa phezu kokukhathazeka ngokuqhamuka komkhuhlane womlomo lamasondo.

“Ngithanda ukulazisa ukuthi ngikhulume lomunye wami oweZimbabwe ukuthi singalwisana njani lokumemetheka kwe foot and mouth. NjengeBotswana, sesiphume lecebo elizanceda iBotswana kanye lomazwe asemhlubulweni wethu.”

Namuhla uMasisi wethekelele imizi eseduze lomngcele lapho abalimi abamethulele ubuhlungu obusezifubeni zabo besithi kuqiniswe ukulinda emngceleni leZimbabwe.

Abalimi abafana lo Mnu. Albert Foda, odabuka emzini weSiviya, ucele uMasisi ukuthi kufakwe amasotsha kanye lamapholisa ahlomileyo emngceleni.

“Uhulumende wethu kazame ukusebenzisana lohumende weZimbabwe, njalo azame ukubasiza ngemithi yokuhlaba inkomo. Akuqiniswe ucingo emgceleni, kungezelelwe labalindayo ama security agents.”

Umlimi emangweni weMangwe, uMnu. Mhlupheki Dube, uthi izandla zimfitshane kwele Zimbabwe ukuthi liliswane lomkhuhlane wezifuyo owomlomo lamasondo.

“IBotswana leZimbabwe kumele asebenze ndawonye ukulwisana. IBotswana ithengisa inyama phetsheya ngakho yiyo ezwa ubuhlungu kakhulu. Thina ubuhlungu bethu bunganeno kodwa bukhona.”Ihofisi yommeli weZimbabwe kwele Botswana ithi amazwe womabili azama ukulwisana lokumemetheka komkhuhlane womlomo lamasondo. Ithi imihlangano ebanjwe phakathi kwabomongameli bobabili eHarare ngoNcwabakazi, ithinte kakhulu ngokuthi umkhuhlane lo ungalwiswa kanjani.

Esikhathini esisanda kudlula eleBotswana linikize eleZimbabwe imithi yokulwisa umkhuhlane womlomo lamasondo, noma nje isilela.

Facebook Forum

XS
SM
MD
LG