Uhulumende wakwele Bhilithane uthi kumele eleSouth Africa lingenele kudaba lokuvalelwa kuka Mnu. Job Sikhala labanye bakhe entilongweni besetheswa amacala okutshotshozela udlakela kulandela ukubulawa kuka Nkosikazi Moreblessing Ali, owayelilunga lebandla leCitizens Coalition for Change (CCC).
USikhala loMnu. Godfrey Sithole, abangamalunga edale lephalamende, bavalelwe labanye babo abalitshumi lane, okuthiwa batshotshozela udlakela eNyatsime kusanda kubulawa uNkosikazi Ali ngabacatshangelwa ukuthi ngamalunga ebandla leZanu PF.
ULord Goldsmith, ophethe uhlangothi olubona ngokudlelana lamanye amazwe njalo okwenzakala ewofisini yeCommonwealth kanye lokuthuthukisa eleBhilithane, utshele idale leHouse of Lords ukuba iNkosi uPrince Charles ufisa ukuba kulungiswe udaba lwabo Sikhala kanye lodlakela lwezombusazwe.
Utshele amanye amalunga edale leli ngoLwesihlanu ukuba kuyethusa okwenzakala eZimbabwe ngakho-ke kumele eleSouth Africa lingenele kudaba luka Sikhala labanye bakhe abavalelwe eChikurubi Maximum Security Prison.
Kodwa uMnu. Chris Mutsvangwa utshele iStudio 7 ukuba eleBhilithane kalilani lokwenzakala eZimbabwe.
UMutsvangwa uthe eleBhilithane kumele lilungise udaba lweIreland hatshi ukutshona lizihlupha ngezombangazwe elizweni elibuswa nguMongameli Emmerson Mnangagwa.
UMnu. Mlungisi Moyo, okubandla leZanu PF, uthi ekuyamangalisa ukuba abakwele Bhilithane bazihlupha ngokwenzakala eZimbabwe.
UMnu. Msongelwa Ndlovu, isikhulumeli sebandla leZapu, uthi ibandla elibusayo lephula ilungelo loluntu okwenze eleBhilithane lavusa umhlonga.