amalinks wokungena

Breaking News

Kuqhubekela Phambili Ukwephulwa Kwamalungelo Oluntu eZimbabwe


Omunye wabesifazana owatshaywa kabuhlungu eMatobo ngabacatshangelwa ukuba ngamalunga ebandla leZanu PF.

Ukwephulwa kwamalungelo oluntu kuqhubekela phambili elizweni njalo abacubungula ezombusazwe bathi ukhetho oluzayo olukhangelelwe ukwenziwa phakathi kwenyanga kaNtulikazi loNcwabakazi luzabe lungakhululekanga. Emavikini adluleyo kuqhamuke udlakela phakathi kwamalunga ebandla elibusayo eleZanu PF.....

Inhlanganiso ezilwela amalungelo oluntu kanye lamabandla ezombusazwe bathi ukwephulwa kwamalungelo oluntu kuyanda eZimbabwe njalo uhulumende kumele akulungisise kungakenziwa ukhetho oluzayo.

Ukwephulwa kwamalungelo oluntu kuqhubekela phambili elizweni njalo abacubungula ezombusazwe bathi ukhetho oluzayo olukhangelelwe ukwenziwa phakathi kwenyanga kaNtulikazi loNcwabakazi luzabe lungakhululekanga. Emavikini adluleyo kuqhamuke udlakela phakathi kwamalunga ebandla elibusayo eleZanu PF leliphikisayo eleCitizens Coalition for Change eMatopo lesigabeni seInsiza kungakenziwa ukhetho lwama by-elections.

Amalunga ebandla eliphikisayo atshaywa kabuhlungu. Ekuqaleni kweviki, uhulumende uqhube inhlelo ezehlukeneyo ekhankasela ukwesulwa kwezijeziso zenotho ezetheswa inkokheli yebandla leZanu PF, okuthiwa yephula ilungelo loluntu njalo iqhuba ukhetho olungakhululekanga. Uhulumende uthi izijeziso lezi zibhidliza umnotho weZimbabwe. EleMelika leleBhilithane athi kazisoze zesulwe izijeziso lezi kuze kulungiswe konke okwenziwa libandla elibusayo. Amabandla aphikisayo lawo ayakuchothoza okwenziwa libandla leZanu PF. UMnu. Patron Xaba, unobhala webandla leMthwakazi Republic Party, uthi kunengi okonakale eZimbabwe.

“NgoLwesibili kubonakale bebhikisha betshengisela ukuthi kukhitshwe amasanctions elizweni, kodwa ke amasanctions awaqondani lelizwe alabantu abathile abayizikhulu zeZanu PF ezingalandeli amalungelo oluntu esithi ngama human rights. Lokhu sekuze kwabonakaliswa ngokuthi sebeze bayadinga abantwana besikolo ukuze babancedise ekumatsheni kuyikuthi amasanctions asowelizwe ngawezikhulu zeZanu PF.

Umongameli webandla leZAPU, uMnu. Sibangilizwe Nkomo, uthi into yonke eyoniwa ngomlomo ilungiswa ngawo ikakhulu nxa inkokheli zingaba lemfundiso enhle kubalandeli.

“Kwezodlame lwe-politics okukhulu ngenkhokheli ukuthi bafundisani abalandeli babo ukuthi benzani emphakathini. Awungeke uthi ungumkhokheli uyekhuluma uthi wena ungumuntu othanda ukuthula kweyinye indawo uthi uzasebenzisa imvubu elesawudo utshela abantu. Umkhokheli welizwe kumele ananzelele amagama akhe ngoba abantu bayalalela bayalandela; ukubulawa kwabantu kuqala ngenkulumo yomlomo akuqali kweyinye indawo. Njenga bakhokheli bezinhlanganiso, asikhulumeni into eyodwa ukuthi kungabi lodlame,ngesiNdebele kuthiwa 'koniwa ngomlomo kulungiswe ngomlomo.'”

Umqondisi we-Youth for lnnovation Trust, UNkosikazi Thando Gwinji, uthi amazwe ezwekazi leAfrica ayakhuthazwa ukuthi azixazululele inhlupho zabo bengacelanga usizo.

“Nxa sikhangele ezentuthuko ama-International lama-Regional platforms esilawo kulez' insuku ayakhuthaza amazwe e-Africa ukuthi azilungisele inhlupho zawo ngokwawo bengagxili kakhulu ku-Aid lasezikweledeni, nxa sikhangele ezomnotho kakhulu kuyakhuthazwa kakhulu idomestic resource mobilization, ama-resources esilawo ukwenzela ukuthi singahambi sikweleda ukuze silungise inhlupho esilawo.Sibe sesikhangela iAnti Sanction Day esibelayo ukuthi imali leyana ngabe siyithethe njenge lizwe sayisebenzisa ukwakha izikolo.”

UMnu. Believe Gaule, ilunga lebandla leZanu PF, uthi njenge zizalwane zeZimbabwe bazazama ngendlela zonke ukuze izijeziso zenotho zesulwe.

“Uhulumende weZimbabwe uzama ngendlela zonke ukuthi etshengisele encediswa yiSADC ukuthi amasanctions lawa kumele ukuthi asuswe ahluphekisa abantu beZimbabwe. Le yindlela yokuganga eyenziwa ngama-Western countries wokuthi bazondise abantu ngokuhlupheka. Kuzayenziwa yonke indlela ukuthi ama-sanctions asuswe, sizayenza yonke into njenga maZimbabwean ukuthi siqhubekele phambili silwisa.”

Ngenyanga kaNcwabakazi, inhlanganiso ye-Zimbabwe Peace Project yenza uphenyo yathola ukuba amalungelo oluntu ephulwa kakhulu libandla le-Zanu PF kulandela amapholisa labanye abezomvikela. Okwamanje, abakubandla le-CCC agoqela amalunga edale lephalamende UMnu. Job Sikhala loMnu. Godfrey Sithole labanye abalitshumi lane bavalelwe entilongweni kulandela ukubotshwa kwabo ngenyanga kaNhlangula kusanda kubulawa uNkosikazi Moreblessing Ali eNyatsime. Betheswa amacala okutshotshozela udlakela lokunye. Bonke balelwa ukuba behlawule isibambiso sebail.

Facebook Forum

XS
SM
MD
LG