Kulabantu asebekhulile abahlaselwa ngumkhuhlane wokufiphala kwenhlambu zamehlo, obizwa ngokuthi yi-eye cataract ngeSilungu. Ingcwethi kwezempilakahle zithi umkhuhlane lo uyelapheka ungabonakala masinyane.
Umkhuhlane wokufiphala kwenhlamvu zamehlo uvame ukuhlasela abantu abadala labalomkhuhlane wetshukela. Welatshwa ngokuphalwa kwamehlo. UNkosikazi Julia Dube, olomkhuhlane lo, uthi lokhe ebhoda ezibhedlela edinga usizo ngoba uvalwa yibulembu obusemehlweni.
"Ngagula amehlo phambi komnyaka ophelileyo ngahamba ngaya eMpilo, kumnyaka ophelileyo ngahamba futhi bafike bangiphala amehlo kuyisikhathi seCovid nxa sibuyela singatholi madokotela angizange ngiphinde ngibuyele kuze kube khathesi. Ngihambe ngaya eCentral bathi ngibuye after two weeks kodwa angiboni kulenkungu emehlweni."
Umongi uNkosikazi Sibonelo Madlela uchasisa kabanzi ngomkhuhlane wokufiphala wenhlamvu zamehlo.
"I-cataract yisifo samehlo ngesintu sithi yibulembu okubangela lesisifo sijwayele ukubakhona ebantwini abaletshukela kumbe abale high blood pressure,iBp ehlala ikhwelile kakhulu.lzibonakaliso zakhona umuntu uqala engasaboni kusiya kukhula njalo ungakhangela uyabona kulecircle emhlophe phansi kwenhlamvu yelihlo nxa kusiya kukhula iring leyana isondela enhlamvini yelihlo kucina kuvala ilihlo.Kubakhona ebantwini abadala kukalutshwa ukuthi utholakale ebantwaneni yisifo eselaphekayo kungaphangiselwa."
UMnu. Thabiso Mthembu, umongi osebenza koBulawayo, uthi kuphalwa ubulembu obuyabe sebubonakele, umuntu abuyele esimeni sakhe.
"Umkhuhlane lo uyelapheka njalo umuntu engahamba ku operation ukuthi ayephalwa lobu bulembu akuthathi sikhathi eside ukuthi ebuyele ebone njalo. Okwenzakalayo yikuthi ilance le eyabe isiwonakele yiyo ekhitshwayo kube sekufaka eyinye ezasebenza endaweni yaleyi ekhitshiweyo umuntu eziphilele impilo efanayo."
Kuviki ephelileyo ngoLwesine umsekeli kaMongameli njalo engumphathintambo wezempilakahle, uMnu. Constantino Chiwenga, evula okusemthethweni uhlelo lokwelapha abantu abakhathazwa ngumkhuhlane wokufiphala kwenhlamvu zamehlo eHarare, uchaze ukuba abantwana abazinkulungwane eziyisitshiyagalombili – 8,000 balomkhuhlane wamehlo.
UChiwenga uthe abanye abantwana laba bazelwe belomkhuhlane wamehlo kuti njalo elinye inani yilabo abalemikhuhlane etshiyeneyo, egoqela owendingindi. Wengeze esithi ukusilela kwemali kuhulumende sekudale ukuba uhlelo lokwelatshwa amehlo luphathwe yinhlanganiso ezizimeleyo ezeZimbabwe kanye lezangaphandle kwelizwe. Kuviki ephelileyo kwelatshwe abedlula amakhulu amahlanu - 500 ngokungela mbhadalo esibhedlela seParirenyatwa.