amalinks wokungena

Breaking News

Umuntu Oyedwa Phakathi Kwabalitshumi Ulomkhuhlane Wetshukela Kwele Zimbabwe


Diabetes Association of Zimbabwe
Diabetes Association of Zimbabwe

Abezempilakahle bakhuthaza abantu eZimbabwe ukuba bahlolwe umkhuhlane wetshukela. Kubikwa ukuba kulomuntu oyedwa phakathi kwabalitshumi olumkhuhlane wetshukela emhlabeni wonke jikelele.

Lokhu kwethulwe ngodokotela labongi esibhedlela esizimeleyo eHarare ngosuku lokulimukisa uzulu ngomkhuhlane wetshukele, olweWorld Diabetes Day. Bathi umkhuhlane wetshukela utholakala ngokudla ukudla kwalez’insuku njalo umuntu ulakho ukuwuthapha ebazalini lakubokhokho bakhe.

Umongi uNkosikazi Brenda Ndlovu uchasise kabanzi ngomkhuhlane wetshukela.

Uthi kumele uzulu weZimbabwe enanzelele ukuba uphila njani ukuze enqabele lumkhuhlane.

Lokhu kugcizelelwe nguDokotela Peter Hadebe othi umkhuhlane wetshukela ulakho ukuphazamisa indlela abantu abaphila ngayo.

Omunye umongi uNkosikazi Mafu, okade ehlola abantu esibhedlela lesi, ukhuthaza uzulu ukuba azimisele ukuhlolwa umkhuhlane wetshukela.

Kubikwa ukuba banengi abantu eZimbabwe abahlaselwa ngumkhuhlane wetshukela.

Inhlanganiso yeUnited Nations ibika ukuthi kulabantu abedlula izigidi ezingamakhulu amane – 460 million emhlabeni wonke jikelele abaphila lomkhuhlane wetshukela. Inhlanganiso le ithi liyakhuphuka inani labalomkhuhlane lo, olakho ukwenza abantu bebeyiziphofu, begule umkhuhlane wezinso, owenhliziyo leminye.

Abanye baqunywa inyawo ngenxa yomkhuhlane lo. Uzulu ukhuthazwa ukuba ahlale ehambahamba kumbe ezelula ukuze engahlaselwa ngumkhuhlane wetshukela.

XS
SM
MD
LG