HARARE - Idale leHigh Court namuhla livumele amalunga ebandla leCitizens Coalition for Change alitshumi lane – 14 ukuba ehlawule isibambiso sebail kulandela ukuvalelwa kwabo entilongweni okwensuku ezedlula ikhulu lengxenye – 153.
Amagqwetha athi amalunga eCCC la avunyelwe ukuhlawula inkulungwane ezingamatshumi amahlanu zamadola eZimbabwe – 50,000 umuntu munye ngamunye. Umthethwandaba uthe akumelanga bephazamise udaba lolu ngokuxoxa labafakazi njalo kumele behambe enkambeni zamapholisa insuku ezimbalwa ngeviki. Betheswa amacala okutshotshozela udlakela. Omunye wabo, uMnu. Job Sikhala, omele iZengeza West edale lephalamende, lokhu evalelwe eChikurubi Maximum Security Prison.
USikhala ubemiswe namuhla emthethwandaba lapho obekumele kuqale ukuthethwa icala lokutshotshozela udlakela eNyatsime kulandela ukubulawa kuka Nkosikazi Moreblessing Ali ngabacatshangelwa ukuba ngamalunga ebandla leZanu PF.
UMnu. Godfrey Sithole, omele iChitungwiza North edale lephalamende, owayevalelwe loSikhala labanye, uvunyelwe ukuhlawula isibambiso sebail ngeviki ephelileyo. Abakubandla leCCC bathakazelela ukukhululwa kwabanye babo loba belokhu bekhala ngokuvalelwa kuka Sikhala. Igqwetha labalitshumi lane laba, uMnu. Noble Chinhanu, uchasisa okwenzakale emthethwandaba.
UMnu. Felix Magalela Mafa, okubandla leCCC, uthi akubamangalisi okwenziwe namuhla ngumthethwandaba.
UMnu. Believe Gaule, okubandla leZanu PF, uthi okwenziwe ngumthethwandaba kuveza ukuba ikhululekile imithethwandaba eZimbabwe.
Ingcwethi kwezombusazwe, uMnu. Effie Dlela Ncube, uthi kwakumele abantu laba bephiwe isibambiso sebail besanda kubotshwa.
Isikhulumeli sebandla leCCC, uNkosazana Fadzai Mahere, uthi kumele kukhululwe uSikhala ngoba ulelungelo lokuhlawula isibambiso sebail.
USikhala ubesemthethwandaba namuhla obekumele kuqale ukuthoniswa icala aletheswayo elokutshotshozela udlakela. Lokhu kudluliselwe phambili ngoba amagqwetha akhe athi afuna ukuba umthethwandaba umvumele ukuhlawula isibambiso sebail.
Ukhangelelwe ukuba uzaphenduka emthethwandaba ngoLwesihlanu.
Kusenjalo, umdeni kamuyi uMoreblessing Ali, okucatshangelwa ukuba wabulawa ngamalunga eZanu PF, uthi kumele uSikhala akhululwe ngokutshetshe ukuze azebamela kudaba lokulungiselela ukungcwatshwa kuka Nkosikazi Ali.