amalinks wokungena

Breaking News

Intombazana Eleminyaka Elitshumi Lasikhombisa Ibhubha Ngemva Kokubeletha Amawele


Kumemetheka ngamandla ukumitshiswa kwabantwana eZimbabwe.

Kulontombazana oleminyaka elitshumi lasikhombisa – 17 obhubhe ngemva kokubeletha amawele kumbe amaphahla angamankazana.

Lokhu kwenzakala ngesikhathi ukudlwengulwa kwabantwana sokubhahile.

Kulomunye njalo untombazana owayeleminyaka elitshumi lanhlanu esiqintini seManicaland, owabhubha ebeletha ngomnyaka ka 2021, kuthi ngoMvulo kulomntwana oleminyaka eyisitshiyagalonye ophuma esigabeni seTsholotsho, obelethiswe umntwana oyinkazana esibhedlela se-United Bulawayo Hospitals, ngemva kokudlwengulwa ngocatshangelwa ukuba nguyise.

Sixoxe lomama wentombazana esanda kutshona, etshiye amawele, uPrecious Msimanga, osilandisele kabanzi ngodaba lolu.

“Ukuthi uzithwele ngangikwazi ngoba wabuya kimi esezithwele wangitshela ukuthi uzithwele, but ukuthi umithiswe ngubani, umfana wangakhona, kakwazi. So, ngasengisithi kungcono ngimgcine kunjalo, ngingatshoni ngimtshingela kumbe ngimpopotela, sometimes usengahamba esesenza eyinye into eyingozi kakhulu. Ngasengim’dingela imali ukubana ahambe esibhedlela ayehlolwa, ayebhalisa. Ngangisekhaya eFilabusi, ngasuka khongale esevuvuka inyawo kukhanya ukuthi yi-BP. Ngabuya laye koBulawayo, wathola i-voucher kukhansili, wahamba eMzilikazi ekiliniki. Ekilinika bamhambisa eMpilo base besithi kungcono bamgcine bona, bamenze i-operation engazange aye ku-labor.”

UMaMsimanga uthe kwakumele abelethe mhlaka 20 November, kodwa odokotela basebemhlinza mhlaka 1 ngoba besesabela ukuba i-BP yayingalimaza yena labantswana. Kuthiwa wenziwa kuhle leyo operation wazobeletha amantombazana angamawele. Ngemva kwamalanga ayisikhombisa, wazokuya hlolwa njalo eMzilikazi, udokotela wasuthiseka ngendlela ayephola ngayo. Kodwa ngoLwesine oluphelileyo, waqala ukuthi uzwa evaleka, engathi uphela umoya.

“Sam’thatha, samfaka emoteni. Singena egedini leMpilo, waphelela khonaphana, angazange athola i-treatment.”

Uphethe ngokuthi usekhangelane lodubo olumangalisayo ngoba kazi ukuba uzenelisa njani ukugcina amaphahla, kanye lowakhe umntwana oleminyaka emihlanu, ngoba kasayikwenelisa ukuthengisa amatomatisi, okuyikho aphila ngakho ngenxa yokuthi ingane zonke lezi zisasezincance kakhulu.

UMaMsimanga uthi abafisa ukunceda ngokudla, impahla lokunye bengamthola kunombolo ethi: +263777400509.

Facebook Forum

XS
SM
MD
LG