Amapholisa athi abophe abasolwa ababili eBindura abetheswa icala lokudlwengula umntwana oleminyaka eyisitshiyangalombili, 8, wazithwala.
Odokotela babikwa besithi usane lukantombazana lo aluhlalanga kuhle esiswini, okuthiwa yi breech ngesilungu.
Umbiko lo uza ngesikhathi uzulu ecunuke kakhulu ngodaba lomntwanyana oleminyaka efanayo owadlwengulwayo laye, obelethe ngeviki ephelileyo koBulawayo.
Kulomunye njalo untombazana oleminyaka elitshumi lasikhombisa, 17, obhubhe ngemva kokubeletha amawele koBulawayo kunsuku ezedluleyo.
OweBindura lo ubikwa ehanjiswe esibhedlela ngababalisi bakhe bebona isisu sikhukhumele wayahlolwa kwasokubonakana ukuthi ulesisu esesisalelwe zinyanga ezintathu kuphele ukuthi abelethe.
Isikhulumeli samapholisa uMnu Paul Nyathi wazise izolo ukuthi babophe abesilisa ababili abalinganayo abaleminyaka yokuzalwa elitshumi lasikhombisa.
Izehlakalo zokudlwengulwa kwabantwana eZimbabwe sezibhahe kakhulu.
Sixoxe lesiphathamandla senhlanganiso elwela amalungelo abesifazana lawabantwana eyeWomen of Zimbabwe Arise, iWOZA, uNkosazana Magodonga Mahlangu.
