amalinks wokungena

Breaking News

UChamisa Uthi uMnangagwa Labanye Bakhe Babezama Ukumvala Umlomo Ngokumnika Imota Kahulumende


UMnu. Nelson Chamisa, umkhokheli webandla leCCC. (Courtesy Image)

UMnu. Nelson Chamisa, umkhokheli webandla elibusayo eleCitizens Coalition for Change, uthi wala ukuthatha imota kahulumende weZimbabwe ngoba uMongameli Emmerson Mnangagwa labanye bakhe babezama ukumthulisa njengomntwana okhalela inamunede kumbe inja ethakazelela ithambo.

UChamisa wethule amazwi la ephendula okukhulunywe nguMnu. George Charamba, isikhulumeli sika Mnangagwa njalo ophethe uhlangothi olubona ngokwenzakala ewofisini kamongameli labaphathintambo bakahulumende.

UChamisa utshele uBlessing Zulu weStudio 7 ukuthi kathiywa ngakudlayo.

"Nxa sitshelwa ngezimnandi, izikhundla lokunye okuthenjiswa nguhulumende, asilandaba lakho. Asidingi ukuthola inzuzo, asidingi kudla esizakukholisa sodwa. Sizama ukuvuselela ilizwe leZimbabwe elihlutshwa yizinto ezinengi. Kulabantu abanengi abahluphekayo abahlala phandle kwelizwe abadubekayo. Sifuna ukuvuselela umnotho welizwe.

"Lokho okokunika abantu amapulazi, angilifuni mina ngoba angikwazi ukulima. Lokhu okokunika abantu izimota kangiyifuni ngoba anginjengo uMichael Schumacher otshayela izimota zemidlalo yemintinsiwano ye-racing. Asivumelani lakho konke lokhu okufiswa nguhulumende. Sikhangele inswelo zikazulu hatshi ukuzithuthukisa thina."

UMnu. Ambrose Sibindi uthakazelela ezombusazwe.

“Lokhu kuveza ukuba uChamisa yindoda ekhaliphileyo. Kafuni ukungena kuhulumende weZimbabwe okwebiwa yonke into. Ufisa ukulwela uzulu."

Kodwa uMnu. Mlungisi Moyo, ilunga lebandla leZanu PF, uthi kwakumele uChamisa amukele imota lesikhundla sokhokhela abaphikisayo edale lephalamende.

Facebook Forum

XS
SM
MD
LG