amalinks wokungena

Breaking News

Abalandeli Beqembu leSenegal Bathakazelela Ukunqoba Kwalo Emdlalweni weWorld Cup


UFamara Diedhiou wakwele Senegal ulithela embuleni emdlalweni weWorld Cup.
UFamara Diedhiou wakwele Senegal ulithela embuleni emdlalweni weWorld Cup.

Abalandeli bomdlalo wenguqu bahalalisela iqembu lakwele Senegal ngokunqoba elikwenze ngoLwesihlanu eleQatar nge 3 ka 1 emdlalweni wesibaya sikaGroup A kumncintiswano wezizwe zomhlaba, oweWorld Cup 2022, oqhutshelwa khonale kweleQatar.

Impumela yomdlalo lo itsho ukuba iqembu leSenegal libe ngelakuqala kumaqembu amele izwekazi leAfrica kumncintiswano weFIFA World Cup 2022 ukuthola imiklomelo emithathu.

Umlandeli womdlalo wenguqu uStanislas Mbeke uthi limpumela izakhuthaza kakhulu amanye amaqembu akwele Africa aphatheka kulumncintiswano.

“Ukuthi iSenegal inqobile sekungapha ithemba amanye amaqembu afana laboGhana anqotshiweyo ukuba labo bakhuphule amasokisi labo benze njengayo iSenegal balwise, kwazi bani, mhlawumbe baze bafike kusigaba se final.”

Umdlali weqembu leBosso 90 uZibusiso Mahlangu uthi impumela yomdlalo wanamhlanje imjabulise kakhulu njalo inhle kakhulu kuzwekazi laseAfrica jikelele.

“Lapha thina njengabantu baseAfrica sijabulile ngokunqoba okwenze iqembu leSenegal lisidla eleQatar. Sokubonise amanye amaqembu aweAfrica ukuba amanye amaqembu ayadleka khonale.

Benze kuhle kakhulu abeSenegal ngoba bekuvele kungasoze kube kuhle ukuba iqembu eliphuma kuzwekazi laseAfrica liphume kulumncintiswano lingazake linqobe lizitholele imiklomelo emithathu kumbe emine kusigaba sezibaya.”

Omunye njalo umlandeli womdlalo wenguqu uDonell Chiweshe uthi besekuvele sekusethusa ukudlala kwamazwe aseAfrica kulumncintiswano wezizwe zomhlaba.

“Iqembu leSenegal lenze kuhle kakhulu. Yimpumela enhle leyi ezakwenza amanye amaqembu aseAfrica lawo aphakamise amasokisi atshaye amanye amaqembu.

Phela besekungani siphelekezela abanye kulumncintiswano, sekungani thina kuzwekazi laseAfrica sifile.”

Iqembu leSenegal selilemiklomelo emithathu ngemva kokunqoba kwalo namhla njalo lihlezi endaweni yesithathu engalaneni yemiklomelo eyesibaya sikaGroup A.

Amazwe awezwekazi leAfrica aseQatar kulumncintiswano ngathi lona eleSenegal, Tunisia, Cameroon, Morocco leGhana.

Amaqembu amabili azabe ehlezi endaweni eziphezu kwengalane ekupheleni kwemidlalo yezibaya yiwo azadlulela kusigaba esilandelayo esomncintiswano.

Emdlalweni wesibaya sikaGroup B odlalwe namhla iqembu leIran linqobe eleWales nge 2 ka nya.

Balutshwane abakade bekhangelele limpumela njengoba iqembu leWales lilabadlali abalodumo abafana loGareth Bale kanye loAaron Ramsey ikanti eleIran lona libhaxabulwe nge 6 ka 2 ngeleEngland emdlalweni walo wakuqala.

Iqembu eleNgilande libengutshiki lobhanqa 0-0 leleMelika.

XS
SM
MD
LG