WASHINGTON DC - Amapholisa athi kulezigebengu ezihlasele kwelinye igalaji elithengisa amafutha ezimota eKwekwe zatshontsha imali ephezu kwengxenye yesigidi samadola aseMelika, US$582,000, lenkulungwane zamaRand aseSouth Africa ezingamatshumi phose ayisithupha, R58,430.
Isikhulumeli samapholisa uMnu Paul Nyathi wazise ukuthi isehlakalo lesi senzakale phakathi kwamabili ngoMvulo.
Izigebengu lezi bezilitshumi lambili, 12, njalo bezihlome ngombhobho wohlobo lweAK-47 kanye le-pistol, kuchasise uNyathi kumbiko awethulele abezindaba.
Wengeze wathi abasolwa bafike kuleligalaji, lona angaliqambanga ngebizo, babopha onogada ababili ngentambo zezicathulo bathatha imali banyamalala.
UNyathi uthe abangaba lolwazi ngezigebengu lezi kumele bayebikela amapholisa kungaba kuyiphi inkamba.
Ukudalwa kwamacala anje ngabantu abahlomileyo sokuyinsakavukela umchilo wezidwaba eZimbabwe.
