Ibandla leCitizens Coalition for Change (CCC) lithi lisahlolisisa amaphepha esivumelwano samalunga edale lephalamende lohulumende okuthenga indawo zokwakha izindlu ngesikwelede esifika inkulungwane ezingatshumi amane zamadola eMelika – US$40,000 umuntu munye ngamunye.
UMnu. Felix Magalela Mafa, umsekeli wesikhulumeli sebandla leCCC, uthi bazahlala phansi lamalunga abo edale lephalamende bebone okumunyethwe emaphepheni okuthenga indawo zokwakha.
UMafa uthi bazakhuluma lentathelizindaba bengenza lokhu ngoba okwemanje abalabufazi bokuthi bavumelana ukuba bazathenga njani njalo behlawule kutheni imali kahulumende.
UMnu. Temba Mliswa, okhokhela ikhomithi ebona ngenswelo zikazulu, uthi amalunga edale lephalamende bavuma ukuthatha imali le ngoba bahola imali yeZimbabwe elesilinganiso samadola angamakhulu amabili – US$200 ngenyanga umuntu munye ngamunye.
UMliswa uthi abaphathintambo bakahulumende bazathola US$500,000 umuntu munye ngamunye eyokuthenga izindlu kumbe indawo zokwakha izindlu.
Banengi abantu abasola lokhu abagoqela uMnu. Believe Gaule, okubandla leZanu PF, othi kumele uhulumende akhangelane lenswelo zikazulu hatshi ukunika amalunga edale lephalamende imali yokuthenga izindlu.