Iqula lengcwethi zezomthetho kwele South Africa lithi uMongameli Cyril Ramaphosa wephula isisekelo sombuso ngendlela aphatha ngayo udaba lokutshotshwa kwemali epulazini lakhe lePhalaphala eLimpopo.
Iqula leli elakhethwa lidale lephalamende ukuthi licubungulisise ukuthi umongameli Ramaphosa wephula umthetho na ngendlela aphatha ngayo ukutshontshwa kwemali epulazini lakhe, lithi kunengi akwenzayo okukhombisa ukuthi wephula umthetho.
Lithi okwakuqala wephula umthetho owenqabela umongameli ukuqhuba inhlelo zamabhizimusi ngesikhathi engumongameli welizwe.
Wabuya njalo wephula umthetho wokumangalwa kwamacala ngemva kokwehluleka ukuyavula icala emapholiseni kulandela ukutshontshwa kwemali epulazini lakhe.
Lithi njalo wasebenzisa amandla akhe okwedlulise amalawulo ngokusebenzisa abalindi bakhe lemali kahulumende ukuzingela labo abatshontsha imali yakhe.
Ngokutsho kwesisekelo sombuso wakwele South Africa ukwephulwa kwale imithetho kuyizizatho eziqinileyo zokuthi umongameli abanjwe ngamandla ukwehla esikhundleni lesi kumbe axotshwe umsebenzi. Ingcitshi kwezomthetho eUniversity of Cape Town umnumzana Richard Calland uthi uRamaphosa usephakathi kwetshe lembokodo.
Uthi la amacala abhekane loRamaphosa makhulu okokuthi kufanele akhethe ukuthi azehlele esihlalweni kumbe ehliswe.
Igqwetha leZimbabwe, uMnu. Vusumuzi Sibanda, uthi okwenzeka kweleSouth Africa kukhombisa ukuthi umthetho uyalandelwa.
Uthi yinto efanayo okufuze yenzakale eZimbabwe lapho okusanda kuvela ukuthi uMongameli Emmerson Mnangagwa uphe amalunga edale lephalamende labaphathintambo bakhe izikwelede ezithethwe esikhwameni sikahulumende ngokungekho emthethweni.
Unobhala jikelele webandla le Zimbabwe Communist Party, uMnu. Ngqabutho Mabhena, uthi okwehlele uRamaphosa kukhombisa sobala ukuthi amabandla alwela impi yenkululeko awenelisi ukulandela umthetho.
Lesisehlakalo senzeka ngesikhathi lapho ibandla le ANC likhangelele ukuqhuba ukhetho lwenkokheli zalo ngoMpalakazi wenyanga ezayo.
URamaphosa uncintisa esikhundleni sokuba mgumkhokheli waleli bandla okwehlandla lesibili. Amabandla aphikisayo labanye
Amabandla aphikisayo athi uRamaphosa kufanele ahle ehle esikhundleni sakhe. Le ngenye yezinkulumo esivela lasemalungeni ebandla leANC okugoqela lesiphathamandla saleli bandla uNkosazana Dlamini Zuma yena ancintisana laye esikhundleni sokuba ngumkhokheli.
Kodwake isikhulumeli sebandla leANC, Pule Mabe, utshele abezindaba usudluliselwe phambili umbiko oqakathekileyo obekumele wethulwe nguRamaphosa.
Kusenjalo, ihofisi kaRamaphosa yethule umbiko isithi usephakathi kokubala umbiko owethulwe liqula lengcitshi leli kantike kungekudala uzakwethula impendulo yakhe.