amalinks wokungena

Breaking News

Kunanzwa Usuku Lokulwisana Legciwane leHIV olweWorld AIDS Day


World AIDS Day

EleZimbabwe limanyene lamanye amazwe womhlaba ukunanza ilanga lokuqakathekisa umsebenzi wokuvimba ukuthelelanwa kwegcikwane lengculaza eleWorld AIDS Day lapho elibe lomkhosi omkhulu, owenzelwe eMarondera eMashonaland East.

Lonyaka ifikile iminyaka engamatshumi amane kanye - 41 lokhu igcikwane lengculaza laqhamuka emazweni womhlaba kodwa inengi liqhubeka lihlaselwa yiwo.

Ekhuluma emkhosini eMarondera umqondisi weNational AIDS Council, uDokotela Bernard Madzima, ubike ukuba basebenza gadalala ukwehlisa ukumemetheka kwegciwane leli elizweni ngesikhathi sinye bekhuphula inani labantu abathola amaphilisi ehlisa igciwane emzimbeni ama-ARV’s.

Uchaze ukuba inani labantu abahlaselwa yilo umkhuhlane elizweni liyehlile lisuka kunkulungwane ezingamatshumi phose amabili lanhlanu – 24,900 ngomnyaka ka2020 lisiya kunkulungwane eziphezu kwamatshumi amabili – 22,800 ngomnyaka ka2021.

Uqhubekele phambili ethi kuleli abantu asebethola amaphilisi ehlisa igcikwane sebekusilinganido sokungamatshumi athobaminwemibili ekhulwini - 92.43%, emizameni yokuthi kuthi sokufika umnyaka ka2030 umkhuhlane wegcikwane usiyehlile ezweni.

Inkulumo kaDokotela Madzima ihambelane lekamqondisi wenhlanganiso yomanyano wamazwe womhlaba eyeWorld Health Organization, uDokotela Tedros Adham Ghebreyesus, othi inani lababanjwa igcikwane leHIV ezwekazi leAfrica liyehla kodwa kulabantu abamqoka amakey populations abangatholi amaphilisi abayibo abememethekisa igcikwane emhlabeni jikelele.

Umqondisi weNAC koBulawayo, uNkosikazi Senatra Nyathi, uthi sebenanzelele ukuba kulabantu abaphila leHIV abaku maARV’s asebethatha izidakamizwa.

“Sikhathazekile njengeNAC ngabantu asebethatha izidakamizwa ngapha nekuhlelo lweART ngoba balakho ukulibala ukunatha amaphilisi njalo kulakho ukuphazamisa ukusebenza kwamaphilisi emzimbeni futhi asibakhuthazi ukuthi banathe amaphilisi bewahlanganisa lezidakamizwa.”

UNyathi uqhubeke ethi ukuthatha izidakizwa kuyaphazamisa ukusebenza kwamaphilisi emzimbeni.

“Izidakamizwa azilungelamga ukuhlanganiswa lamaARV uma ukwenza dinga usizo masinya uyeke ukuhlanganisa ngoba kuzakwenza ukuba ugule njalo sekhulileke ukufika kuzibopho zethu zika2030.”

Umongameli weEconomic Freedom Forum, uMnu. lnnocent Ndibali, uthi inani labantu abathatha izidakamizwa liyaliqansa lobanje bekhangelele ukuba kusiyafika umnyaka ka2030 ingculaza ibe isiyehlile ezweni.

“Isizwe sesilahlekile upholstered benatha izidakamizwa ezibulala umzimba ngikhangelele uhulumende ukuba angenele ngoba isizwe sizatshabalala ngokuhlanganisa amaphilisi lezidakamizwa.”

Okwamanje kulabantu abedlula amakhulu amathathu abahlala phandle kwelizwe kodwa bethatha amaphilisi abo esibhedlela seMpilo Centre of Excellency Hospital asebabumba iqembu lokuphana ulwazi lokucebisana ngempilakahle yabo enkundleni yokuxhumana ekamakhalekhukhwini eyeWhatsapp Group yalesisibhedlela.

Lonyaka umhlaba unanza ilanga leWAD namhlanje mhlaka 1 Mpalakazi ngaphansi kwendikimba ethi “Equalize.”

Facebook Forum

XS
SM
MD
LG