amalinks wokungena

Breaking News

Abezwekazi leAfrica Sebethembele Kwele Senegal Emidlalweni yeWorld Cup


Abalandeli belizwe leSenegal

Izwekazi leAfrica selithembele kuMorocco leSenegal kumncintiswano wokudinga intshantshu zomdlalo wenguqu emhlabeni jikelele.

Owadlalela iqembu labasakhulayo eleAmaZulu njalo osengumtshayeli katshova, uKudzi Makari, uthi akungeke kumangalise nxa amaqembu amele izwekazi leAfrica engadlulela kusigaba se-quarter-final.

“Umncintiswano wezizwe zomhlaba siyawubona ukuthi awungeke uwuqonde ngoba sibona amaqembu abekhangelelwa phansi ehlupha amaqembu amakhulu. Okwenzakalayo yikuthi lathi sisuka singabikwazi ukuthi kuhambanjani, sungathola iqembu leSenegal linqoba eleEngland kanye leleMorocco selinganqoba eleSpain njengalokhu elakwenza eleBelgium.

“Okukhona yikuba amaqembu amakhulu akuseyiwo esasiwakhangelele njengakudala, njengabo Argentina ukuthi sasikwazi ukuthi badlala njani. Siyehluleka ukuyibamba njalo lekubhejeni kusuka kusiphazamise ngoba siyabe sibheje imali ezinkulu.”

Osakhulayo laye ongumdlali wenguqu, uShane Zirehwa, uthi iqembu leSenegal lingayiphakamisa inkezo yezizwe zomhlaba sakudlala nje.

“Indlela iqembu leSenegal elidlala ngayo lidlala ibhola elimangalisayo. Akulabantu abanengi abakade belethemba ukuba lingaphuma kusigaba sezibaya kodwa lenelisile ukuphuma njalo njengabantu esikhangelele kubo ngengezizalwane zeAfrica bazasiphakamisela inkezo yezizwe zomhlaba.”

Owadlalela iqembu lesizwe, uRonald ‘Gidiza’ Sibanda, uthi okusuka kuphazamise amaqembu ezwekazi leAfrica kumncintiswano wezizwe zomhlaba yikuba abadlali basuka bengasadonsi kanye kanye.

“EAfrica silabo abadlali abadlala emazweni abalisa aboEngland labo Spain kodwa okusilelayo yikubambana sibeliqembu. Angazi kumbe senziwa ludubo lwethu eAfrica ngoba uyathola omunye esedlalela ukuthi abonakale yena yedwa ukuze athole umsebenzi kwamanye amaqembu, ikanti labana abantu bona bayabe bekwazi ukuba baliqembu linye.

“Ngikhumbula sisaqeqetshetshwa nguWesterhof, wayehlala esitshela ukuba wathi eqeqetsha iNigeria, wayebatshela aboOkocha ukuba isikhathi sesiphelile abayekele ukwenza izitayila. AboOkocha baqala ukukholisa ibhola yena waze wathathelwa ibhola iqembu leItaly layahlohla lalinganisa. Thina kwesinye isikhathi sisuka siphonguthabela eceleni senze izinto ezingelancedo njengalokhu ebengisithi uOkocha wakwenza, kulokuthi sivumelane ukuba leyi yimbheji kasivaleni ibhola ukuze sinqobe sidlulele kusigaba esilandelayo.”

Iqembu leSenegal lizadibana leleEngland ngehola lethoba munwe munye namuhla ebusuku ikanti eleMorocco lona lizadlala leleSpain ngoLwesibili ntambama ngehola lesihlanu.

Amaqembu asefinyelele kusigaba se-quarterfinal ngabalisa eleNetherlands lona elinqobe eleUnited States of America nge 3 ka 1 ngoMgqibelo kanye leleArgentina lona elinqobe eleAustralia nge 2 ka 1.

Kweminye imidlalo eyesigaba se Round of 16 iqembu leJapan lizangqikilana leleCroatia, eleBrazil lizadlala leleSouth Korea, kuthi iPortugal izatshayana leSwitzerland.

Facebook Forum

XS
SM
MD
LG