amalinks wokungena

Breaking News

Amalunga eCCC Azakwamukela Izikwelede zeUS$40,000 Eziphiwa Abammeli Bedale Lephalamende


Gift Ostallos Siziba Citizens Coalition For Change

Ibandla eliphikisayo eleCitizens Coalition for Change (CCC), selize lavuma ukuba amalunga alo edale lephalamende emukele izikwelede zamadola azinkulungwane ezingamatshumi amane akwele Melika- US$40,000.

Ekhuluma emhlanganweni lentathelizindaba, amalunga edale lephalamende awe-CCC athi loba nje uzulu ebasola ngokwamukela limali, kumele azwisise ukuba baphila nzima njalo limali ayiveli kubandla leZANU PF, kodwa ngeyokuthi basizakale.

Umsekeli womkhokheli wamalunga ephalamende aweCCC, uNkosikazi Sichelesile Mahlangu, uthi bathatha limali njenge sikwelede esithi bazayibhadala.

“Siyabavumela nxa besithi imali kwakungamelanga siyithathe. Yikuthi kabazi ukuthi yavela ngaphi. Asizange sibatshele ukuba sihlangana lakuphi njengama MPs. Esihlangana lakho nxa sifika ngapha abakwazi. Silobunzima obufuna imali”

Uqhubeke esithi kunengi abakhala ngakho edale lephalamende ngoba besebenzisa imali zabo okwenza becine sebephila nzima.

Umsekeli wesikhulumeli sebandla le CCC, uMnu. Gift Ostallos Siziba, uthi njenge bandla bazalandela wonke amalunga abo awephalamende ukuze babhadale imali le ngemva kweminyaka emihlanu.

“Umongameli watsho ukuba sifuna ukuthi siqedelane lendaba zokudliwa kwemali. Imali leyi sayithatha iyimali yokuba bethole izindlu. Sivumelene ukuba labo abathatha imali kumele bayibisele. Sithi kabhadale limali”

Ummeli weNkulumane edale lephalamende, uMnu. Kucaca Phulu, uthi njengebandla bazaqhubeka beqonqosela kuhulumende ukuba bathole indawo zokusebenzela eziqintini zabo lokuba babe lezisebenzi ezibancedisa umsebenzi.

“UMP nxa kuthiwa ukuzakuba ngu-MP zikhona izinto okumele abe lazo. Kumele kube lomuntu ehofisini ekhangela ukuba kuyini okufuna kwenziwe. Kumele sibe lamahofisi. Mina ihofisi ngilayo konke abanye kabalawo amahofisi”

Kodwa uMnu. Witness Dube, owebandla le-MDC-T, uthi abammeli beCCC kabakhulumi iqiniso ngoba kusobala ukuba lokhu abakutshoyo lokwakhulunywa ngumkhokheli wabo akuhambelani.

“Siyawakhuthaza amadale ephalamende ukuba bekhulumele abanye abantu. Simangaliswa ngabanye bethu abe CCC sebethethe leyo mali bezenza abantu abazwayo.”

Umkhulu wedale lephalamende, uMnu. Kenneth Chokuda, walile ukukhuluma ngodaba lolu esithi ukuphiwa kwabameli bedale lephalamende imali akulani lozulu ngoba zimali zomsebenzi.

Umhlangano owenziwe ngoLwesithathu ulandela omunye obuphakathi komkhokheli weCCC, uMnu. Nelson Chamisa, lamalunga ephalamende la kuyonale iviki lapho okuhlafunwe khona loludaba kabanzi uChamisa waveza insolo yakhe njalo amalunga ephalamende lawo emchasisela ukuthi kungani eyithethe limali.

Limali yaphiwa amalunga wonke ephalamende, agoqela wona aweCCC, aweMDC-T kanye lawebandla leZanu PF. Uhulumende uthi limali yizikwelede zokuncedisa amalunga ephalamende ukuthi akhe kumbe athenge izindlu.

Amalunga la athatha limali azithulela zwi angani akwenzakalanga lutho, udaba lolu lwaze lwavumbululwa zintathelizindaba. Kulapho uChamisa aqala khona laye ukusola amalunga ebandla lakhe esithi aphambanisile.

Abaphathintambo bakahulumende bona baphiwa ingxenye yesigidi ngamunye, US$500.000, kwathi abasekeli babo bathola inkulungwane ezingamakhulu amathathu, US$300.000.

Uhulumende usolwa kakhulu ngabanengi abathi udlalise imali ebingaphathisa ilizwe kundaba zokutholisa uzulu amagetsi aneleyo lokunye okutshiyeneyo.

Facebook Forum

XS
SM
MD
LG