Abogatsha lwezemfundo sebekhuthazwe ukuthi baqhatshe ababalisi abakhuluma isiSotho esiqintini se-Gwanda South, ukuze abafundi kulumango baphumelele ezifundweni zabo. Linkuthazo ivele lapho kusungulwa ngokusemthethweni inhlanganiso yeZimbabwe Sotho Development Initiative Trust i-ZIMSODI ezalwela ukulondolozwa lolulimi.
Ulimi lwesi-Sotho lukhulunywa kakhulu esiqintini seGwanda South njalo abafundi bakuqala ukubhala imihloliso yesiSotho ngomyaka ka2019 ngemva kweminyaka eminengi singafundiswa ezikolo.
Ekhuluma lapho kusungulwa linhlanganiso ngokusemthethweni e-Gwanda District Club izolo, uNkosikazi Sipho Mdlongwa oyisiphathamandla sikamanisipala we-Gwanda, uthi kuyadingeka ukuthi ugatsha lwezemfundo luqhatshe ababalisi abenelisa ukukhuluma indimi ezikhulunywa ngabantu bakuleyondawo ukuze abantwana abaqala izifundo zabo bazwisise ngcono.
“U-Grade 1 kakakwazi isikhiwa ngapha umchasisela ngesilungu kumbe ngesi-Ndebele yena ekhaya usuka esi-Suthwini, kungakho kuqakathekile ukuthi ababalisi nxa libaqhatsha ikakhulu abe ECD liqhatshe ababalisi abazwisisa isi-Sotho ukuze abantwana bazwisise ngcono, abanye abantwana behluleka ngoba ababalisi bechasise ngolimi abangaluzwisisiyo.”
Umqondisi wenhlanganiso ye-Zimbabwe Sotho Development Initiative Trust i-ZIMSODI uNkosikazi Maretha Dube, ongumqeqetshi wolimi lwesi-Sotho e-Midlands State University uthi, inengi labeSotho kalitholanga ithuba lokusifunda eminyakeni edlulileyo, njalo kuyadingeka ukuthi kubhalwe ingwalo ezizafundwa ngamaSotho ezikolo.
“I-siSotho safundiswa kubo-Gobadema Mission kodwa saphonguphela nje, kodwa ukuphela kolimi kwenzakala njani? Mina ngathi ngisiyaqalisa isikolo ngomnyaka 1969. Isi-Sotho sasingasi fundiswa kubo Grade 1, njalo kwaqalwa ukubhalwa imihloliso yesi-Sotho ngomnyaka ka-2019 kuze kube lakathesi asikabi lo-Form 4 oseke wabhala isiSotho: Asila mabhuku ayeneleyo kusukela kumfundo yaphansi kusiya fika e-University.”
Isikhulumeli sogatsha lwezemfundo uMnu Taungana Ndoro uthi lumqoka udaba lokuthi kuqatshwe ababalisi abakhuluma indimi zasekhaya njalo bayakulungisisa lokhu.