Iqembu leMorocco lilwisa ukuba ngelakuqala elikuzwekazi leAfrica ukuba zintshantshu zomdlalo wenguqu emhlabeni jikelele.
Sekusele amaqembu amane kumncintiswano wenguqu owokudinga intshantshu zomhlaba jikelele oweWorld Cup 2022, oqhutshelwa kwele Qatar. Amaqembu la ngele Argentina lona elizadlala leCroatia kanye leFrance yona ezangqikilana leMorocco. Umqeqetshi womdlalo wenguqu osebenza labasakhulayo, uButholethu Ngwenya, uthi loba yiliphi iqembu phakathi kwamaqembu lawa lilalo ithuba elokuphakamisa inkezo ekupheleni komncintiswano.
“Ngibona angathi wonke amaqembu alamathuba afanayo. Ungakhangela iqembu leMorocco liyakwazi ukuvikela isango layo, eleFrance lona lidlala lisebenzisa itransition, eleArgentina liyapasa ibhola ikanti leleCroatia lalo liyapasa futhi. Nxa ngikhangela isemi – final yakuqala ephakathi kweCroatia leArgentina womabili lawamaqembu adlala ngokufanayo ngoba ayaliqala emuva ibhola.
“Laku semi – final eyesibili lakho amaqembu akhona adlala ngendlela efanayo eyokusebenzisa itransition. Ngicabanga kodwa ukuba iqembu leMorocco lisesimeni esihle esokuphakamisa inkezo loba nje abantu sebengathi sengidonsela ingubo kimi njengomuntu waseAfrica.
Ngaphandle kweMorocco ngingathi iCroatia yiyo layo elethuba elihle okokuthi kufinal sekungadlala iMorocco leCroatia njalo nxa kungaya ngesifiso sami kunqobe eleMorocco.”
Umdlali wenguqu, uPhindani Ngwenya, uthi ukhangelele iqembu leArgentina ukuba kube yilo eliphakamisa inkezo.
“Mina iqembu engibona angathi lingaphakamisa isicoco ngeleArgentina ngoba liyifuna ngamehlo abomvu linkezo njalo selisinde esimeni ebesingamanga kuhle kumidlalo eyedluleyo.
Iqembu leFrance ngilibonile kodwa umdlalo wayo wangoMgqibelo ubulokuqilibezela obebusenziwa ngunompembe okokuthi angiyiboni idlulela phambili isiyadlala kufinal.
“Okunye vele kuzazenza ngoba ukhona vele umdlali okumele ayiphakamise inkezo engakathathi umhlala phansi uLionel Messi. Kumele athi esethatha umhlalaphansi eseke waphakamisa isicoco weWorld Cup.”
Omunye njalo umqeqetshi wabasakhulayo, uAnele Nyathi, uthi ilizwe leZimbabwe lingabe limisiwe ukudlala lamanye amazwe kodwa kunengi elingakufunda elizweni leMorocco.
“AbeMorocco baqala phansi basebenza labasakhulayo kucele labesilisa lakucele labesifazane.
Sikhuluma nje balenhlelo abazisungulayo abazazibuyelela bezihlolisise ukuba ziphumelele kangakanani ngomnyaka ka2024. Lokhu ngokugoqela ukuba bakhuphule inani labesifazane abadlala ibhola kanye lenani labafana abasakhulayo abaleminyaka engaphansi kwetshumi lambili abadlala ibhola.
“Lokhu kwenza babelenhlelo ezicacayo ezokuthuthukisa umdlalo wabo.
Yikho lathi kumele siqale phansi sisebenze labasakhulayo njalo sibe lendlela ecacileyo ukuba siyenzani njalo sihloseni. Kuqakathekile njalo ukuba silungisise indaba yokubukhokheli bomdlalo wenguqu silandele khonokho okufunwa yinhlanganiso yeFIFA ukuze phela senelise ukudlala lamanye amazwe.”
Imidlalo yesigaba se semi–final iyaqala ngoLwesibili mhla zilitshumi lantathu lapho iqembu leArgentina elizadibana khona leleCroatia kuthi ngoLwesithathu iqembu leFrance lizangqikilana leMorocco. Amaqembu azanqoba kusigaba se semi – final azadibana kufinal ngeSonto mhla zilitshumi lathoba minwe mbili.