amalinks wokungena

Breaking News
Umhlangano weUS-Africa Leaders Summit

Abamele iZimbabwe Balungiselela Ukungena Umhlangano Omkhulu oweU.S. Africa Leaders Summit eWashington DC


WASHINGTON - Uqala ngoLwesibili umhlangano omkhulu oweU.S. African Leaders Summit eWashington DC lapho uMongameli Joseph Biden azakwamukela inkokheli yezwekazi leAfrica labakunhlanganiso ezizimeleyo. Iziphathamandla zikahulumende weZimbabwe zisemhlanganweni lo oqakatheke kakhulu ekuthuthukiseni amazwe atshiyeneyo.

UBiden ukhangelelwe ukuba uzakwenza imihlangano embalwa lenkokheli yezwekazi leAfrica kanye lalabo abamele amazwe abo ngoLwesithathu langoLwesine. Okunye okuzakhulunywa emhlanganweni lo yikuvuselela ubudlelwano bamazwe ezwekazi leAfrica lele Melika, ukuqhuba ukhetho olubalulekileyo, ukuba lohulumende kazulu, ukunqabela ukukhahlanyezwa kwabantu, ukuthuthukisa umnotho womhlaba wonke jikelele, ukunqabela ukukhudumala komkhathi, ukwethulwa kwenhlelo zokulima eziphakeme lokunye. EleZimbabwe limelwe emhlanganweni lo nguMnu. Frederick Shava, umphathintambo kahulumende obona ngokudlelana lamanye amazwe. UMnu. Moussa Faki, umgcinisihlalo wohlangothi lweAfrican Union Commission, uthi uqakathekile umhlangano lo.

UMnu. Munashe Mtutsa, okubandla leZanu PF, uthi uhulumende wakwele Melika ukhanya esefuna ukudlelana kahle lohulumende kaMnangagwa.

Uthi manengi amazwe afisa ukudlelana lele Zimbabwe loba inkokheli yelizwe leli imphansi kwezijeziso zenotho.

Ingcwethi kwezombusazwe lezizalwane zeZimbabwe ezihlala eMelika zithi akukhanyi kahle okuzakwenziwa ngele Zimbabwe emhlanganweni lo. UMnu. Phithizela Ngcobo, ohlala eMaryland, uthi kuhle njalo kubi okuvunyelwa kwele Zimbabwe ukuba ingene umhlangano lo.

UNgcobo uthi eleZimbabwe kumele lilungise konke okuhluphayo ukuze livunyelwe ukungena imihlangano le.

Umhlangano weU.S. Africa Leaders Summit usuleminyaka embalwa wasungulwa kwele Melika. Amazwe avinjwe lonyaka ukuba angene umhlangano lo ngele Burkina Faso, Mali, Guinea lele Sudan, axotshwa kumanyano weAfrican Union ngenxa yokugenqulwa kwababusayo emazweni la.

Amanye amazwe aphansi kohlelo lweAfrican Growth and Opportunity Act, eyenze kube lula ukuthi amazwe akuzwekazi leAfrica athengise impahla etshiyeneyo kwele Melika kungelamthelo we-tax.

Facebook Forum

XS
SM
MD
LG