amalinks wokungena

Breaking News

Bathi Impi Ye-Ukraine Iphazamisa Umnotho WeZimbabwe


World Food Program

Uphenyo lwabe WFP luveze njalo ukuba impi le ivele yaqhamuka umhlaba ususithi usuphuma enxakini ezibangelwe leinye impi yokumelana lobhubhane lwe Covid-19 ndawonye lesivuno esiphansi kakhulu somnyaka ka 2021/22 esibangelwe yikungananga kuhle kwezulu.

Impi phakathi kwele-Ukraine lele-Russia ibikwa isibangele ukuphazamiseka okukhulu kunhlangothi zempilo ezitshiyeneyo kwele Zimbabwe, okugoqela indlala, ukuswelakala kwendlela zokuthumela impahla, umnotho, lokunye. Lokhu kuphume kuphenyo olwenziwe ngabenhlanganiso ebona ngezoncedo lokudla emhlabeni jikelele eye-World Food Programme (WFP).

Uphenyo lwabe WFP luveze njalo ukuba impi yeUkraine ivele yaqhamuka umhlaba ususithi usuphuma enxakini ezibangelwe leinye impi yokumelana lobhubhane lwe Covid-19 ndawonye lesivuno esiphansi kakhulu somnyaka ka 2021/22 esibangelwe yikungananga kuhle kwezulu.

Uphenyo lolu luthi ukukhuphuka kwentengo yamafutha ezimota, yona eqonge esuka kudola elilodwa lengxenye $US1.51 isiya phose kumadola amabili US$1.73 yikho okubangele ukukhuphuka kwentengo yemphahla yonke elizweni lakwamanye amazwe womhlaba.
Abantu abafika izigidi phose eziyisithupha 5.8 million bacatshangelwa ukuba bathwaliswe nzima yindlala.

Kuthi abantu abangaba yisilinganiso sokungamatshumi aphezu kwamahlanu ekhulwini - 53% lisuka kumatshumji phose amane -39% kumnyaka odluleyo yibo ababhekane lendlala eMatebeland North, kulandelwa ngabantu abayisilinganiso sokungamatshumi amane ekhulwini - 40% kusuka kumatshumi amabili lanhlanu ekhulwini - 25% ababhekane lendlala e-Mashonaland West.
I-WFP iphinde yathi abantu abanengi sebephila ngemali abayithunyelwayo yizihlobo labemuli abasemazweni besithi imali le isetshenziswa ukuthenga ukudla kuphela.

Ingcitshi ezikhulume ngaloluphenyu zithi lulakho ukuba luqinisekeli besithi kumele ele-Zimbabwe libe lendlela zokulungisisa udubo lwendlala.

Lokhu kutshiwo ngu Mnu. Timothy Sithole ingcitshi ecubungula ezombusazwe yena othi kumele ele-Zimbabwe liqine ngokulima.

“Ele Zimbabwe kumele liqine ngokulima ngoba kuzaba nzima nxa impi leyi ingaqhubeka. Indlala leyi eyokuthemba ngokudla okuvela kwamanye amazwe ayilunganga”

Lokhu kusekelwe ngu Mnu. Denford Mutashu okhokhela inhlanganiso ye Confederation of Zimbabwe Retailers yena othi udubo lwe-Ukraine luphazamise amazwe omhlaba ikakhulu asathuthukayo njenge Zimbabwe.

“Ukuphazamiseka okubangelwa yikuswelakala kwamafutha kagetsi kuphazamisa kakhulu amabhizimusi kuleli. Sibona engani kumele kube lendlela zokulungisa lokhu”
Ingcitshi ecubungula ezomnotho uMnu. Felix Dube uthi okwenzakala eUkraine akulani lokwenzakala kuleli.

“Kumele ele Zimbabwe, libe lendlela zokuhlala lilungisele. Akulani lalokho okuse-Ukraine ngoba i-Zimbabwe ilomhlabathi wayo omuhle”

Imizamo yokuthola umbono kahulumende yehlule kodwa, embikweni wakhe wokwethula uluhlu lwendleko kahulumende lokubuthaniswa kwemali yalewo ndleko olwe Budget, umphathintambo wezemali uMnu. Mthuli Ncube wazise ukuba uhulumende uzabeka imali eceleni ukuze iye ekwakhiweni kwamadamu okuphathisa abalima amasimu okuthelezela, awe irrigation, ukuze ilizwe lilwisane lendlala.

Facebook Forum

XS
SM
MD
LG