amalinks wokungena

Breaking News

Bakhankasela Ukuphiwa Ilungelo Lokuthengisa Ucansi Okusemthethweni


Commercial sex workers protest in South Africa

Obona ngokuqoqwa kwenhlelo ze-Zimbabwe Sex Workers Alliance uMnu. Gregory Brighton Khatha, odume ngokuthi nguTony, uthi e-Zimbabwe babhekane lenqwaba yenhlupho ngenxa yemithetho eyenqabela ukusebenza kwabo.

Abathengisa imizimba eZimbabwe sebemanyene labosowabo ezansi yezwekazi le-Africa kunkuthazo yokuthi bavunyelwe ukwenza lumsebenzi ngokusemthethweni ukuze basebenzele endaweni eziphephileyo.

Laba ngabathengisa imizimba labantunje abebesemkhosini wokwethulwa kombiko wamalungelo abo eJohannesburg.

Umbiko lo uveza ukuthi kulokwephulwa kwamalungelo okukhulu kwabathengisa imizimba emazweni abalisa i-Zimbabwe, i-South Africa, i-Botswana le-Mozambique.

Obona ngokuqoqwa kwenhlelo ze-Zimbabwe Sex Workers Alliance uMnu. Gregory Brighton Khatha, odume ngokuthi nguTony, uthi e-Zimbabwe babhekane lenqwaba yenhlupho ngenxa yemithetho eyenqabela ukusebenza kwabo.

“Ukubandlululwa le-violence kungaba ngama-clients, kumbe ngamapholisa, kumbe amanye ama-sex workers. Uyakwanisa ukutshontshelwa kumbe ukutshaywa ngama-clients kumbe even police brutality, and also, uyakwanisa ukuthengelwa abantu ngamanye ama-sex workers ngoba bayabe belomona kumbe something.”

Ngokutsho kwalo umbiko owethulwe ngemva kocwaningo oluqhutshwe yinhlanganiso ye-Hands-Off Programme, kulezehlakalo zokwephulwa kwamalungelo abathengisa imizimba ezedlula izinkulungwane ezimbili (2009), ezenzakale emazweni abalisa i-Zimbabwe, i-South Africa, i-Botswana le-Mozambique kusukela ngoMpalakazi ka 2021, kusiyafika kuMpandula ka 2022.

Esethula lumbiko eJohannesburg, uNkosazana Pamela Chakuvinga oyisizalwane seZimbabwe njalo eyisiphathamandla enhlanganisweni yabathengisa imizimba kwele-South Africa eyeSisonke, uthe abathengisa imizimba emazweni la bayabulawa, bayatshaywa, bayadlwengulwa, bayatshontshelwa lokubotshwa mahlayana.

Uthi bathole ukuthi abathengisa ucansi laba bahlukunyezwa emizimbeni, emoyeni, ngokocansi langokuthathelwa imali yabo. Uthi sebephakathike kohlelo lokulwela imithetho esekela lo msebenzi emazweni asezansi yezwekazi le-Africa.

EZimbabwe kutholakele ukuthi ezinye inhlanganiso zezenkolo ziqhubeka zisethula inkulumo ebangela inzondo kwabathengisa imizimba.

Esinye isizalwane se-Zimbabwe njalo esibona ngokuqhutshwa kwenhlelo zabathengisa umzimba abasakhulayo ezansi yezwekazi le-Africa uMnu. Leeroy Gumbo, uthi sebethole ukuthi sekusanda kakhulu ukuhlukunyezwa kwabathengisa imizimba abaphansi kweminyaka engamatshumi amathathu.

Uthi uhlupho yikuthi imithetho emazweni amanengi yenza kube licala ukuthengisa ucansi ngakho okuzenza izinto zilunge yikwethulwa kwemithetho evumela ukwenza lokhu ngokusemthethweni.

Ezinye izehlakalo zokwephulwa kwamalungelo abathengisa imizimba laba zigoqela ukungemukelwa ezinkonzweni, ukukhangelwa njengabantu abangcolileyo, ukuncitshwa ukwelatshwa ezibhedlela lokubandlululwa emphakathini.

Uhulumende we-South Africa useluqalile uhlelo lokuthi ucansi luthengiswe ngokusemthethweni njengoba ukubunjwa komthetho ohlose lokhu sekukubanga laphezulu.

Lobanje uhulumende we-Zimbabwe engakaphumeli obala ngalapho ome khona ngodaba lokusebenza kwabathengisa ucansi ngokusemthethweni, isinqumo esethulwe ngumthethwandaba ngo2015, ngemva kokubotshwa kwabesifazana abebesetheswa icala lokuthengisa ucansi, saveza ukuthi akukho emthethweni ukubabophelanje ukuthi batholakale besemgwaqweni kungelabufakazi bokuthi bebethengisa ucansi. Lokhu sekwenze ukubotshwa kwabo kungafani lekuqaleni.

Kodwake abathengisa ngemizimba laba bathi noma kusasenzima ukusebenza kwabo, ithemba balalo ukuthi ngelinye ilanga labo bazavunyelwa ukusebenza ngokusemthethweni.

please wait

No media source currently available

0:00 0:05:40 0:00

Facebook Forum

XS
SM
MD
LG