Izulu lesiphepho lidale umonakalo omkhulu kuWard 20 eGwanda South ngeviki edluleyo latshiya izakhamizi zisegcekeni ngoba zidilizelwe imizi laze laquphuna lezihlala.
Izakhamizi zeMkhalipe, Bodwe leSeboza zisele zisegcekeni kulandela ukuna kwezulu leli ebelilolaka lomoya owesabisayo ophakamise uphahla lwezindlu laquphuna lezihlahla.
UNkosikazi Glory Mbedzi oweBodwe uthi kune izulu ebelilolaka olwethusayo elimatshayele indlu yokulalayadilika.
"Ngathi ngisekhitshini ngaphongubona kuqhuphuka umoya lezulu lamatshe ngathi kutsho ngelansukuzonke ngazihlalela ekhitshini khonapha lahle lavala ngizama ukuthi ngilunguze ngingaboni lutho nxa uthi ulunguze uthelwa ngamanzi ngapha ekhitshini linethela ngithwele usane olulenyanga ezine lithe lisibangcono ngiphuma ngathola indlu sidilikile konke lempahla kugcwele indawo yonke."
Uthi njalo badinga usizo lokusukumisa indlu yabo ngoba yena labantwabakhe abayisithupha sebelala egcekeni.
“Kuthe indlu yami sidilikile ngadobha amazenge ngayenza indawo lapho engingafihla khona ikhanda labantwabami,besicela uncedo kuhulumende kanye labanye abanganceda sithole indawo yokuhlala ngoba kunje kulendlala”
UMnu Onetsi Sebata oyisakhamuzi seMkhalipe uthi kubuye umoya omkhulu kakhulu ophakamise amazenge kweyinye indlu azodiliza ikhitshi abakade behlezi kilo balimala.
USobhuku weBodwe UMnu George Ndlovu uthi umkhulu omanakalo oyehlele izakhamizi zesigaba sakhe.
“Okwenzakale endaweni yakithi yisimanga esikhulu, izindlu zidilikile, kwaquphuka izihlala abanye lokhu bedinga amabirth certificate aphetshulwe ngumoya.”
Ngolwesithathu kuliviki abahlenga uzulu engozini abeCivil Protection Unit CPU bebambisane labenhlanganiso yeRed Cross bavakatshele imuli ezehlelwe yilumonakalo bezokwethula uncedo lokudla lengubo.
Umgcinisihlalo weCPU esiqintini seGwanda UMnu Thulani Moyo ukhuthaze Izakhamizi ukuthi zakhe izindlu eziqinileyo ukuze zivikeleke engozini ezifana lalezi.
“Sixwayisa uzulu ukuthi nxa esakha afake ibrickforce ukuze izindlu ziqine sithe sisizwa umonakalo saqoqana labe Red Cross kungakho sibuyele lamhlanje lokudla lezinye impahla.”
Kusenjalo abeCPU bendawonye lababona ngezomumo yomkhathi sebekhuthaze izakhamizi ezabelweni zeMatabeleland South leNorth ukuthi ziqaphele izulu elizavelela kweleBotswana kulimpelaviki. IZulu leli liqale ukuna endaweni ezitshiyeneyo ezibalisa isiqinti seGwanda izolo ebusuku.
Umbiko okhitshwe zingatsha lezi uveza ukuthi izulu leli lilakho ukuphakamisa uphahla lwezindlu lokuwisa izihlala. Ngalokhu uzulu ukhuthazwa ukuthi ahlale ezindlini lapho izulu lisina njalo engalingi achaphe imfula ngenyawo laloba ngezimota.