amalinks wokungena

Breaking News

Umthethwandaba kaMantshi Ukhulula Ngesibambiso Se-Bail, Abathathu Ababotshwe Belungiselela Ukunanza i-Unity Day


UNkosazana Samu Tshuma umqondisi weGirls Table, umsekeli kamqondisi welbhetshu LikaZulu uMnu Tamsanqa Ncube lelunga lenhlanganiso le, uMnu Melusi Nyathi phambi komthethwandaba kaMantshi

Abathathu laba ababotshwe NgoLwesine, balala bevalelwe estokisini, bazomiswa phambi komthethwandaba, kaMantshi NgoLwesihlanu, besetheswa icala lokwephula usahluko 37 wesisekelo sombuso ngesikhathi benanza ilanga le-Unity Day.

Umthethwandaba kaMantshi owe-Bulawayo Magistrate Court, ukhulule uNkosazana Samu Tshuma umqondisi we-Girls Table, umsekeli kamqondisi we-lbhetshu LikaZulu uMnu Tamsanqa Ncube lelunga lenhlanganiso le, uMnu Melusi Nyathi, ngokubahlawulisa isibambiso se-Bail, senkulungwane ezingamatshumi amabili zamadola eZimbabwe-ZW$20,000 umuntu ngamunye.

Abathathu laba ababotshwe NgoLwesine, balala bevalelwe estokisini, bazomiswa phambi komthethwandaba, kaMantshi NgoLwesihlanu, besetheswa icala lokwephula usahluko 37 wesisekelo sombuso ngesikhathi benanza ilanga le-Unity Day.

Bulawayo Magistrates Court
Bulawayo Magistrates Court

Bebemelwe ligqwetha elisebenza phansi kwenhlanganiso yamagqwetha alwela ilungelo loluntu eye-Zimbabwe Lawyers for Human Rights, uMnu. Jabulani Mhlanga owale ukukhuluma leNtathelizindaba ethi uyaphuthuma ukuze izibotshwa zikhululwe masinya ejele.

Esedale uMhlanga ekhulumisana loMantshi uMnu.Busani Sibanda, loMtshutshisi uNkosikazi Mashazhe, ubike ukuba izibotshwa azilansolo lamapholisa lendlela abaphathwe ngayo, njalo uyacela ukuba bakhululwe bathonisiswe icala ababhekane lalo besuka ngekhaya, buye bazalandela zonke iziqondiso zesibambiso. Abathathu laba bakhangelele ukuphenduka edale likaMantshi ngomnyaka ozayo mhlaka 20 Zibandlela.

Umqondisi we-Ibhetshu likaZulu uMnu. Mbuso Fuzwayo, uthi ukwenqabelwa ukunanza ilanga le-Unity Day kuphikisana lenkulumo yokubambana kahulumende.

“Kulusizi ukuba abathathu laba babotshiwe izolo njalo lokhu kumelana lenkulumo kaMongameli Mnangwagwa ayenze lonyaka okusobala kuyewonke umuntu ukuba ulokhe engaqinisi ukuba kubelokuthula lokubambana ezweni, ngoba udaba lombhuqazwe we-Gukurahundi lumele lusombululwe yikubambana. Asisoze sivume njengesizwe ukuba asitshele ukuthi sikhumbule njani umbhuqazwe we-Gukurahundi.”

UMabhalane webandla le-ZAPU koBulawayo uMnu. Vivian Siziba, uthi kuyethusa ukubotshwa kwabantu ngelanga le-Unity Day.
“Kuyadanisa ukuthi abantu bayabotshwa ngelanga le-Unity Day eZimbabwe. Sekufana lokuthi akulazibuse njalo sekungumbuso webhiza lomagada ibhiza.”
Ekhuluma engakabotshwa ilunga le-Ibhetshu LikaZulu uMnu. Melusi Nyathi, uthe kulihlazo ukubotshelwa ukubuthana bonanza abathinteka nge-Gukurahundi.

“Asivumelani lokubotshwa ngelanga sithakazelela i-Unity Day: Sibotshelwani ngoba okwenzakalayo akuhambelani lenkulumo kaMongameli ayenze ngelanga kuvuka kuyi-Unity Day. Lakukhuluma ese-State House ko-Bulawayo kutshoni uma abantu bevinjwa bebotshwa, khona isisekelo sombuso welizwe leZimbabwe lisivumela ukutshengisela mgokuthula.”

Abathathu laba babotshwe izolo balala enkambeni yamapholisa enzikini yedolobho eCentral Police Station, basiwa edale likaMantshi e-Tredgold Magistrate Court, uNcube loNyathi befakwe izankosi ezandleni.

Ngemva kokubavumela ukuthi bahlawule isibambiso ese-Bail uMantshi Sibanda ubakuthaze ukuba bangephuli iziqondiso zesibambiso i-bail. Abathathu laba bakhangelelwe ukukhululwa lamhlanje imali yesibambiso ingabhadalwa kulungiswe lamaphepha okubakhulula ngesikhathi bengakayi ejele le-Khami.

Udubo lokwaliswa kanye lokubotshwa kwabantu betshengisela ngokuthula njengalokho okwehlele abathathu laba ihlala isolwa ngabenhlanganiso zokulondolozwa kwamalungelo oluntu emhlabeni jikelele ezigoqela eye-African Commission On Human and People’s Rights, kanye lenhlangothi zomanyano wamazwe omhlaba owe-United Nations.

Lezi nhlanganiso zithi kulilungelo lomuntu wonke ukutshengisela ngokuthula lapho kulokubahluphayo phansi kwezivumelano zamazwe omhlaba, zokulondolozwa kwamalungelo oluntu.

please wait

No media source currently available

0:00 0:05:10 0:00

Facebook Forum

XS
SM
MD
LG