Ngesikhathi inani labadabuka eZimbabwe elibhubhela njalo lingcwatshwa kweleBotswana lisiya liqonga, ngenxa yokuswelakala kwemali yokuhambisa isidumbu ekhaya, abanye sebesungula inhlelo zokuphathisa abaswelayo ngesikhathi sezimfa.
Kulenani eliphezulu labe-Zimbabwe abacina bebanjwa ngamandla ukungcwaba abemuli kwele-Botswana ngenxa yezinswelo zokuhambisa umuyi ekhaya.
Indleko zokuhambisa isidumbu sisuka kwele-Botswana sisiya eZimbabwe sekubone imuli ezinengi zisekela izihlobo zingcwatshwa kwele-Botswana.
Ngokubona isidingo sokubambisana ngezikhathi zobunzima, eyinye inhlanganiso yezizalwane ze-Zimbabwe kwele-Botswana, eye Bambanani Social Club, isithenge inqola yokuthwala izidumbu zisiya ekhaya.
Umgcinisihlalo wenhlanganiso le, uMnu. Titus Nxumalo, uthi inqola le izaphathisa ekuthwaleni izidumbu.
“Inqola le, siyidalele ukuthi iphathise abantu bahanjiswe ekhaya. Besithola ukuthi umuntu uhamba ibhokisi lingahlalanga ngemfanelo. Abantu bakithi kumele bakwazi ukuthi sesilenqola engabaphathisa ukuthwala izidumbu.”
UNxumalo uthi inhlanganiso ye-Bambanani isiphathise abantu abanengi ngezikhathi zezimfa, bekhathazwa yikuthi kulabantu abanengi abangcwatshwa ngendlela engelanhlonipho.
“Asichelesi ngabantu abangcwatsha e-Botswana, ngoba umuntu kumele ayengcwatshwa kibo, yikho sadala inhlanganiso le ukuthi umuntu ayebekwa ekhaya.”
Esinye isizalwane seZimbabwe kwele-Botswana uthi imizamo efana leye Bambanani iqakathekile ngoba kulenani eliphezulu elabantu bekhaya elingatholi ukungcwatshwa ngenhlonipho.
“Okusijabulisayo yikuthu kukanengi sitshiywa ngabantu kodwa singelandlela yokuthi singanceda njani sicina sicela kubabusi balapha e-Botswana ukuthi bangcwatshe lapha.
Ihofisi yommeli we-Zimbabwe kwele-Botswana yona ibe lenhlelo zokuhambela zonke izizalwane ze-Zimbabwe endaweni ezitsheyeneyo kuleli lizwe ukuzwa inhlupho ababhekane lazo.
Okunye bekuyi kubaphathisa ukuthi bathole amaphepha ukuze kube lula ukuthi bafinyelele usizo endaweni zempilakahle, njalo benelise ukuthola uncedo lapho bedlula emhlabeni, uma belamaphepha aqondileyo.
