Abantu asebebhubhe engozini zomgwaqo ngekhefu lekhisimusi sebefika phose ikhulu, 92, okulinani eliphezulu nxa kuqathaniswa lanyakenye ngasikhathi sinye.
Isikhulumeli samapholisa, uAssistant Commissioner Paul Nyathi uthi kulengozi zomgwaqo ezedlula inkulugwane lamakhulu amabili, 1 285 esezenzakele lumnyaka ngekhefu lekhisimusi.
Unyathi uthi nyakenye ngasikhathi esifanayo kwasekubhubhe abantu abangamatshumi ayisithupha lambili, 62 lanxa inani lengozi zomgwaqo laliphezulu kancane, inkulungwane eyodwa lamakhulu adlula ayisithupha, 1 626.
AbeZimbabwe abahalal eSouth Africa bathi bakhathazekile ngokubhubha kwabanye babo engozini yemgwaqo kulandela ukufa kwabahlanu kuthange ngemva kokuba imota ababekuyo ingqikilane leyinye enkulu eduzane leMusina, emgwaqweni weN1 Highway.
Iziphathamandla zesigodlo seZimbabwe eSouth Africa zibikwa zilufakazile loludaba kuntathelizindaba, njalo zithi zisancedisa ngokuthi kwazakale ukuthi abafileyo ngobani lokuthi izidumbu zabo zithwalelwe ekhaya.
Imbiko ithi sokwabhubha abeZimbabwe abedlula amatshumi amahlanu emangweni ophakathi kwePretoria leMusina kweleSouth Africa kuminyaka emibili edluleyo.
Ukuhlaziya loludaba, uSithandekile Mhlanga weStudio 7 uxoxa loMnu. Bongan Mkhwananzi, isiphathamandla senhlanganiso yeZimbabwe Community in South Africa, yena othi waphosa wehlelwa yingozi emgwaqweni.
