amalinks wokungena

Breaking News

Abantu Abanengi Abethekelele eZimbabwe Ngekhefu leKhisimusi Sebebuyela Emazweni Atshiyeneyo


Botswana Border

Inkulungwane lenkulungwane zabeZimbabwe abasebenza emazweni angomakhelwane sebelubhekisa emuva kulandela ukudlala ikhefu lekhisimusi lomnyaka omutsha ekhaya.

Lonyaka, inengi kade lethekelele ekhaya ngenxa yokuyekethiswa kweziqondiso zokulwisana leCOVID-19.

Umphathintambo obona ngezokungena kwabantu kweleBotswana unkosikazi Annah Mokgethi uthi kuphume phose abantu abafika inkulungwane ezilikhulu lamatshumi amahlanu (145,706) kusukela mhlaka 20 Mpalakazi, 2022 kusiyafika ku1 Zibandlela 2023.

Uthi izihambi lezi bezisebenzisa umngcele weRamokgwebana belubhekise eZimbabwe, kulabanye abasebenzise imngcele emicane efana leMatsiloje leMlambapeli kodwa bengafakwa kunani eliphezulu.

EleSouth Africa lona lithi kwakuphuma abantu besiya eZimbabwe abafika inkulungwane ezingamatshumi amabili (20,000) ngelanga besebenzisa umngcele weBeitbridge.

Inani elinengi ngelabantu abahlala njalo besebenza emazweni aweBotswana kanye leSouth Africa, inombolo zitshengisa ukuthi kungabe kungene abantu abangafika phose ingxenye yesigidi besebenzisa imngcele etsheyeneyo ukuyafika ekhaya ngesikhathi sekhefu.

UNkosikazi Nomsa Ndlovu kade esemngceleni wePlumtree, esithi akuhambeki, izihambi ziqeda amahola amanengi zisemzileni.

"Sifike emngceleni weBotswana sathola ukuthi lomzila kawunyikinyeki. Sithole ukuthi ku no-man’s land kugcwele imota ezeBotswana kanye leSouth Africa. Abanye kade becina bengena inganga ukuthi bayephutsha. Imzila kade imide kakhulu."

Abakubhizimusi yemota ezithwala uzulu babika ukuthi bayenze imali enhle kakhulu ngesikhathi sekhefu, lapho intengo beziqonge okuphindwe kuzekuyefika kathathu.

Omunye olebhizimusi yebhasi ehamba phakathi kweGaborone leHarare, eyeEzinkulu Travel and Tours, uMnu. Charles Ndlovu, uthi kakaze abone ubunengi babantu kangaka emngceleni okwesikhathi eside.

“Ngiphume ePlumtree lamuhlanje umzila wezimota ekade zingena eBotswana bezimangalisa. Abantu abanengi kade behambile sibili ekhaya. Khathesi ngibale amabhasi aphuma egcwele esiya eBotswana afika aficamuncwe mbili.”

Ukuphithizela emngceleni wePlumtree leBeitbridge kuza ngesikhathi inengi labantu sebelubhekisa emuva, ukuyaqala emsebenzi kumnyaka omutsha.

Ngokuswelakala kwamathuba emsebenzi kweleZimbabwe, inengi selaphuma elizweni ukuyadinga amadlelo aluhlaza emazweni afana leBotswana kanye leSouth Africa.

Ocubungula ngezombusazwe, uMnu. Effie Dlela Ncube, uthi ubunengi babantu abaphuma elizweni abumangalisi.

"Ukubona abantu bephuma kangaka kuveza ukuthi akulampilo eZimbabwe. Noma kunzima kulama xenophobia, bakhetha ukuthi bayehlala khonale. Kutshengisa ukuthi inkokheli akulathemba lokuvusa ilizwe."

EleZimbabwe lizabamba ukhetho lokudinga inkokheli entsha lonyaka, kodwa uNcube uthi kaboni abantu bephenduka ekhaya ngobunengi ukuyavota, njengalokhu okwenzakale ngesikhathi bephuma besiya kukhefu lekhisimusi lomnyaka omutsha.

"Lanxa kade befisa ukuphenduka ukuzavota kuzabanzima. Kunzima ukuthi babhalise ukuvota njalo kabavunyelwa ukuvota belapho abakhona ku Diaspora. Njalo imali yokuhamba ayilula ukutholakala.

Abahlala phandle kwelizwe bahambe ekhaya ngobunengi kulandelwa ukuyekethiswa kakhulu kweziqondiso zokulwisana lomkhuhlane we Covid-19.

Kodwa ekuphendukeni abanye babhekana lobunzima ngoba bengena bengelancwadi zokuhambisa, ama phasiphothi.

Facebook Forum

XS
SM
MD
LG