BULAWAYO - Izikolo zivuliwe ngoMvulo eZimbabwe abazali, abafundi lababalisi bekhathazekile ngesimo esisezikolo langenhlawulo yezikolo ekhuphukileyo ngenxa yesimo esibi somnotho welizwe.
Abafundi abanengi abenelisanga ukubuyela ezikolo kulandela ukwehluleka kwabazali ukuhlawulela indleko zonke zemfundo ezigoqela ama-uniform lengwalo.
UNkosikazi Mildred Sibanda, isakhamuzi sakoBulawayo, uthi usehlawulele ingane yakhe esikolo kodwa kalamali yokuthenga amabhuku lokunye okufunakalayo.
“Ifees sengibhadele kodwa imali engingelayo ngeyokuthenga amabhuku lokunye okufuneka esikolo okumele kuthi inyanga yonale iphela kubesekuhanjisiwe esikolo.”
Abanye abafundi baxotshiwe bevula ngoba bengahlawulanga. UNkosilazi Prosperity Nyathi uthi bathwele nzima.
“Kuhle izikolo zivuliwe kodwa udubo yikuswelakala kwemali kunje kufuneka amarent kuthi esikolo kufuneka imali lamabhuku esingelakho okuzadala ubunzima ebantwaneni esikolo njengoba zivuliwe namuhla.”
Olwela amalungelo oluntu, uMnu Vumani Ndlovu, uthi abafundi emaphandleni labo babhekane lobunzima obukhulu, obugoqela ukusilela kwababalisi.
“Zivuliwe izikolo kodwa udubo olukhona ezweni yindlala evangels ukuba labantu behluleke ukuhlawulela abafundi esikolo nanko abafundi bemakhaya lamatitshala babhekane lobunzima njalo lababalisi bayasolwela.”
UMnu Thembakuye Moyo, omele ababalisi emakhaya kunhlanganiso yeAmalgamated Rural Teachers Association, uthi bakhangelele ukukhalala umsebenzi njengoba izikolo sezivuliwe ngoba iholo lingeneli.
“Siwazwile wonke amanga kahulumende okuthi uzahlawulela abantwabethu ezikolo lokuthu uhulumende wenza imali enengi kodwa esehluleka ukusiholisa okuhle nje zivuliwe izokolo lathi sesiyaqala ukubhikitsha ngendlela ezinengi aze a Sipho iholo lethu ngamadola eMelika elidlula amakhulu amahlanu.”
Okhokhela inhlanganiso yeZimbabwe Nationals Students Union, uMnu, Benon Ncube, uthi bakhangelele ukuvula emakolitshinj emfundo yaphezulu kodwa bazafunda nzima ngoba umnotho welizwe unzima kubazali abayibo ababahlawulela ezikolo.
“Sikhangelele ukuvula emakolitshini ethu kodwa udubo yikuthi uhulumende uhlala ekhuphula ifees zikhathi zonke sivula. Okwamanje lokhe esiya edale lomthethwandaba leUniversity of Zimbabwe ngendaba zefees okulakho ukubanzima sivula ngoba abqzali bethu bahola imali engeneli lutho.”
Kulandela ukuma manzonzo kwezomnotho ezweni uhulumende sethembise ukuba kuqala lonyaka uzahlawulela abafundi ezikolo eqala emaphandleni kodwa inengi lithi alimethembi uhulumende ngoba eceleni esehluleka ukuholisa abantu iholo elenelayo.